Саха Өрөспүүбүлүкэтэ эбии төлөбүр харчытын эмчиттэргэ тиксэриигэ бастаан иһэр
Федеральнай бүддьүөттэн коронавирус дьаҥар хаптарбыт дьоҥҥо көмөнү оҥорууга үлэлиир эмчиттэргэ көрүллүбүт эбии төлөбүргэ Уһук Илиннээҕи эрэгийиэннэртэн саамай элбэх үбү Саха Өрөспүүбүлүкэтэ ылбыта итиэннэ тустаахтарга толору тириэртэ.
edersaas.ru.
Владимир Путин муус устар саҕаланыытыгар саҥа коронавирус (COVID-2019) дьаҥар хаптарбыт ыарыһахтарга көмө оҥорор, эмтиир доруобуйа харыстабылын үлэһиттэрин хамнастарыгар эбии төлөбүрү оҥорор туһунан ыйааҕы таһаарбыта. Салгыы бырабыыталыстыба иккис федеральнай эбии төлөбүрү оҥорбута. Бу үбү эмчиттэргэ тириэрдиини Ил Дархан Айсен Николаев тус хонтуруолугар тутар.
Күн бүгүн федеральнай бүддьүөттэн көрүллүбүт эбии төлөбүр харчыта 100 % быраастарга, биэлсэрдэргэ, медсиэстэрэлэргэ, алын сүһүөх үлэһиттэргэ итиэннэ коронавирус дьаҥар хаптарбыт ыарыһахтарга сылдьар инфекционнай биригээдэлэргэ анал бирикээһинэн сыһыарыллыбыт суһал көмө массыыналарын суоппардарыгар бэрилиннэ.
Маны таһынан, Айсен Николаев дьаһалынан, кулун тутартан өрөспүүбүлүкэ бүддьүөтүттэн эмчиттэргэ уонна обсерватордарга үлэлиир исписэлиистэргэ эбии төлөбүр көрүллүбүтэ. Ол эмиэ толору тиэрдилиннэ диэн Ил Дархан уонна бырабыыталыстыба пресс-киинэ иһитиннэрэр.
Раиса Сибирякова, «Саха сирэ» хаһыат, edersaas.ru