Саха Өрөспүүбүлүкэтин күнүн көрсө Айсен Николаев судаарыстыбаннай наҕараадалары туттарда
Саха Өрөспүүбүлүкэтин баһылыга Айсен Николаев Саха сирин социальнай-экэнэмиичэскэй сайдыытыгар сүҥкэн кылааттарын киллэрбит Саха сирин олохтоохторугар судаарыстыбаннай наҕараадалары туттарда.
Өрөспүүбүлүкэ Ил Дархана көрсүһүү кыттыылаахтарын Саха Өрөспүүбүлүкэтин күнүнэн эҕэрдэлээтэ.
“Муус устар 27 күнэ – биһиэхэ дьылҕабытын быһаарбыт бэлиэ күн. Бу күн 1922 сыллаахха автономияны олохтооһуну уонна 1992 сылга Төрүт Сокуон күүһүгэр киириитин кытта сибээстээх. Бэйэтин үйэлээх устуоруйатыгар өрөспүүбүлүкэ сүҥкэн суолу тэлбитэ. Уонна биһиги бүгүн Саха сиринэн – Арассыыйа Федерациятын тутаах регионнарыттан биирдэстэринэн буоларбытынан киэн туттабыт”, — диэтэ кини.
Айсен Николаев кэнники сылга Саха сирин ситиһиилэрин бэлиэтээтэ уонна инники соруктары чопчулаата. Бу соруктары быһаарыы уопсастыба, бары олохтоохтор төрөөбүт сэлиэнньэлэрин, куораттарын, өрөспүүбүлүкэлэрин уонна дойдуларын бүттүүнүн чэчирии сайдыытыгар күүстэрин-күдэхтэрин ирдиир.
“Түмүстэхпитинэ, гражданскай көхпүтүн көрдөрдөхпүтүнэ төрөөбүт өрөспүүбүлүкэбит сайдыытын соруктарын толоруохпут. Бүгүн хас биирдии Саха сирин олохтооҕо төрөөбүт дойдутугар дьоллоохтук уонна этэҥҥэ олорорун, сарсыҥҥы кэскилигэр, оҕолорун уонна сиэннэрин инники олохторугар эрэллээх буоларын курдук дьаһаныахтаахпыт”, — диэтэ Саха сирин Ил Дархана.
Өрөспүүбүлүкэ баһылыга бары наҕараадаламмыттары эҕэрдэлээтэ.
“Бэйэтин күннээҕи сыралаах үлэтинэн Саха сирин туругурдар дьоҥҥо судаарыстыбаннай наҕараадалары туттарыы миэхэ улахан дьол. Тус эппиэтинэскит, өрөспүүбүлүкэ сайдыытыгар кыттыыгыт иһин махтанабын. Тугу ситиспиппит, Саха сирин олохтоохторун олоҕун үчүгэйгэ уларытыы – бу эһиги барыгыт таһаарыылаах үлэҕит түмүгэ”, — диэн түмүктээтэ кини.
Бу күн производство бастыҥнара, култуура, искусство, наука диэйэтэллэрэ, тутааччылар, үөрэх, доруобуйа харыстабылын, тыа хаһаайыстыбатын үлэһиттэрэ, уопсастыбанньыктар, судаарыстыбаннай уонна муниципальнай үлэһиттэр наҕараадаланнылар. Ону сэргэ, Саха сирин үлэһит династиялара бэлиэтэннилэр, “Гражданскай килбиэн” уонна “Итии сүрэх” пуонда бэлиэлэрин туттардылар.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата