Бу күннэргэ Саха Өрөспүүбүлүкэтэ «Кинигэ уонна ааҕыы территорията» диэн ураты Бочуоттаах аатынан бэлиэтэннэ.
Маннык үрдүк аат эрдэ күрэс кыайыылааҕа буолбут уонна ааспыт сылларга үстэн кырата суох бастыҥ эрэгийиэннэр испииһэктэригэр киирбит эрэгийиэҥҥэ иҥэриллэр.
Саха Сирэ бу чиэһи сүкпүт эрэгийиэннэртэн үһүстэрэ. Биллэн турар, «Арктика ааҕар куйаара» бырайыак өрөспүүбүлүкэҕэ ыытыллар «Бииргэ ааҕыахха» ситимнээх тэрээһин тутаах бырайыага буолар. Манна бибилэтиэкэлэр үгүс өрүттээх айар үлэлэрин, Өрөспүүбүлүкэ бу үрдүк ааты сүкпүтүгэр сүдү кылааттарын бэлиэтиир тоҕоостоох.
2020 сыллаахха Саха Сирэ бүтүн Арассыыйатааҕы «Саамай ааҕар эрэгийиэн» күрэс лауреата буолбута. Маннык үрдүк таһымнаах ситиһиилэр өрөспүүбүлүкэбит сайдар кэскиллээҕин бигэргэтэллэр. Ол аата, кинигэ кыһатын оруола улахан. Кинигэ кыһата үрдүк таһымнаахтык тэриллибит эрэ сиригэр маннык көрдөрүүнү ситиһиэххэ сөп.
«Айар» кыһа саҥа сүүрээннэрэ, ситиһиилэрэ өрөспүүбүлүкэ таһыгар кытары сураҕыраллар. Кыһа кинигэлэрэ үгүстүк араас таһымнаах тэрээһиннэр наҕараадаларынан бэлиэтэммиттэрэ: Арассыыйатааҕы «Книга года», «Малая Родина» куонкурустар кыайыылаахтара, Лондоҥҥа, Парижка, Ашхабадка, Мосваҕа, Новосибирскайга, Владивостокка, Рязаҥҥа, Ижевскэйгэ, уо.д.а. норуоттар икки ардыларынааҕы, Бүтүн Арассыыйатааҕы, региональнай быыстапкалар, бэстибээллэр, күрэстэр бириистээх миэстэлэрин ылыталаабыттара. Быйыл «Айар» национальнай кыһа «Ревизор» диэн онус профессиональнай күрэс «Инновационнай кинигэ бырайыага» номинациятыгар бастаата.
«Айар» кыһа үлэтэ биллиҥҥи ыарахан, телевидениени, интэриниэти, социальнай ситимнэри кытта олус улахан конкуренция бара турар кэмигэр ааҕааччыны сайыннарар, ааҕыыга нэһилиэнньэ сэҥээриитин тардар. Тэрилтэ саҥа бырайыактары көрдүүр, айар, араас маркетинговай чинчийиилэри, презентациялары ыытар, уонна да атын саҥа көлүөнэ ааҕааччыларын иитэр-үөрэтэр соруктаах, Сахабыт сирин норуоттарын тылын, култууратын баайын харыстыыр уонна хаҥатар, «ааҕар эрэгийиэн» үрдүк аатын салгыы илдьэ сылдьар сыаллаах-соруктаах тэрээһиннэри ыытар, дьоҥҥо-сэрҕэ туһалаах, ол иһигэр национальнай, хотугу норуоттар тылларынан литератураны таһаара турар.
“Айар” НК пресс-сулууспата