Саха Өрөспүүбүлүкэтэ IV Илиҥҥи экэнэмиичэскэй форумҥа 107 млрд солкуобайдаах сөбүлэһиини түһэристэ

Балаҕан ыйын 11-13 күннэригэр Владивостокка ыытыллыбыт IV Илиҥҥи экэнэмиичэскэй форум үлэтин дойду салалтата үрдүктүк сыаналаата. Арассыыйа Бырабыыталыстыбатын бэрэссэдээтэлин солбуйааччы – Бэрэсидьиэн Уһук Илин федеральнай уокурукка боломуочуйалаах бэрэстэбиитэлэ Юрия Трутнев быйылгы форум Уһук Илин уонна Сибиир социальнай-экэнэмиичэскэй сайдыыларын түргэтэтиигэ кыттарга Арассыыйа да, тас дойдулар да дьыалабыай эргимтэлэрин интэриэстэрэ улаатан иһэрин көрдөрбүтүн, Хотугулуу-Илиҥҥи Азия дойдуларын икки ардыларынааҕы бииргэ үлэлээһини кэҥэтэргэ тирэх буолбутун пресс-конферецияҕа бэлиэтээтэ. Ол курдук, форумҥа барыта 6002 дэлэгээт кыттыбыт, 100 дьыалабыай дьаһал ыытыллыбыт, 3,1 трлн солк. суумалаах 220 сөбүлэһии түһэрсиллибит.

Ил Дархан э.т. Айсен Николаев баһылыктаах Саха Өрөспүүбүлүкэтин дэлэгээссийэтэ форумҥа көхтөөхтүк үлэлээтэ, 1,3 трлн солк. суумалаах 41 инвест-бырайыагынан кыттан, 32 бырайыакка (107 млрд солк) сөбүлэһии түһэристэ. Ол иһигэр Айсен Николаев «Росатом» судаарыстыбаннай корпорацияны кытары өрөспүүбүлүкэҕэ дьоҕус кыамталаах атомнай электростанциялары тутууга, «ДВЭУК» АУо-ну кытары Бүлүү эҥээр улуустары электро-уотунан хааччыйыыга, Камчатканы кытары балыктааһыны, таба иитиитин сайыннарыы бырайыактарын оҥорууга, Арассыыйа венчурнай хампаанньатын кытары саҥа цифровой бырайыактары олоххо киллэриигэ илии баттаста, Арассыыйа «ВИС» хампаанньатын, Кытай CRCC корпорациятын кытары Өлүөнэни туоруур муостаны тутууга концессионнай сөбүлэһии бырайыагын бэлэмнииргэ уо.д.а. меморандум түһэристэ. Эрэгийиэннээҕи сиэссийэҕэ урбааны сайыннарыы усулуобуйатын тэрийиигэ кэккэ этиилэри киллэрдэ. ИЭФ чэрчитинэн ыытыллыбыт Госсэбиэккэ доруобуйа харыстабылыгар үбүлээһини көрөргө бүддьүөт ороскуотун индексэтин үрдэтэргэ эттэ итиэннэ тыын суолталаах эбийиэктэри, Онкология киинин, Кардиология киинин, тутууларын ситэрэргэ туруоруста. Бу туһунан Бырабыыталыстыба Бэрэссэдээтэлин э.т. Владимир Солодов бүгүн күнүс суруналыыстарга кэпсээтэ.

Раиса Сибирякова, «Саха сирэ» edersaas.ru.