Саха оператын номоххо киирбит тенора Семен Оконешников орто дойдуттан барда
Саха Өрөспүүбүлүкэтин Култууратын уонна духуобунай сайдыытын министиэристибэтэ РСФСР үтүөлээх, Российскай Федерация уонна Саха Өрөспүүбүлүкэтин норуодунай артыыһа, СӨ “Гражданскай килбиэн” бочуоттаах бэлиэтин кавалера, «Култуура албан аата» өрөспүүбүлүкэ уопсастыбаннаһын куонкуруһун лауреата, Нам улууһун бочуоттаах гражданина
Семен Петрович Оконешников
өлбүтүнэн дьиэ кэргэнигэр, чугас дьонугар, биир дойдулаахтарыгар, Суорун Омоллоон аатынан Опера уонна балет тыйаатырын кэлэктиибигэр дириҥ кутурҕанын биллэрэр.
СЕМЕН ПЕТРОВИЧ ОКОНЕШНИКОВ
1944 сыллаахха атырдьах ыйын 29 күнүгэр САССР Нам оройуонун Бөтүҥ нэһилиэгэр төрөөбүтэ. Айылҕа биэрбит талаанынан 1962 сыллаахха Саха Музыкальнай–драматическай тыйаатырын уонна Радиокэмитиэт хордарыгар айар үлэтин саҕалаабыта. 1963-64 сс. Дьокуускайдааҕы музыкальнай училищеҕа үөрэммитэ. 1965-68 сс. аармыйаҕа сулууспалыыр сылларыгар, Забайкальетааҕы байыаннай уокурук Кыһыл Знамялаах ырыа уонна үҥкүү ансаамбылын чулуу солиһа этэ.
1975 с. М.П.Мусоргскай аатынан Ураллааҕы консерваторияны (профессор Л.Ф.Дроздова кылааһа) үөрэнэн бүтэрэн, Дьокуускайдааҕы Музыкальнай тыйаатырга, 1991 сылтан Суорун Омоллоон аатынан Опера уонна балет тыйаатырыгар опера солиһынан ситиһилээхтик үлэлээбитэ. 1977 с. Үрүҥ Уолан партиятын толоруутун иһин Саха хомсомуолун бириэмийэтин лауреатын үрдүк аатын ылбыта. 1979 с. “Дьокуускай-79” ырыа куонкуруһун лауреата.
Сүрүн оруоллара: Үрүҥ Уолан (“Ньургун Боотур” опера. М.Жирков, Г.Литинскэй), Лоокуут (“Лоокуут уонна Ньургуһун”. Г.Григорян), Ахмед (“Хотугу сибэкки”. Г.Григорян), Манчаары (“Күн уола”. А.Созонов), Күндэли (“Биһик ырыата”. З.Степанов), Ленскэй (“Евгений Онегин”. П.Чайковскай), Кинээс (“Русалка”. А.Даргомыжскай), Саһыл Ойуун (“Кыһыл Ойуун”. Г.Литинскэй), Владимир Игоревич (“Игорь кинээс”. А.Бородин), Левко (“Майская ночь”. Н.Римскэй-Корсаков), Фауст (“Фауст” . Ш.Гуно), Юродивай (“Борис Годунов”. М.Мусоргскай), Чекалинскай (“Пиковая дама” П.Чайковскай), император Альтоум (“Турандот”. Дж.Пуччини), Жрец (“Аптаах флейта”. Моцарт) о.д.а.
Семен Оконешников – саха норуотун тапталлаах ырыаһыта. Кини кэнсиэртии кэлэрин өрөспүүбүлүкэ бары улуустарыгар, нэһилиэктэригэр мэлдьи кэтэһэллэрэ. Оттон 80-с сылларга “Эҥсиэли” квартет (Семён Оконешников, Семён Дьяконов, Илья Иевлев, баянист Сергей Попов) дьон-норуот билиниитин ылбыта.
Көмүс куоластаах чаҕылхай тенор Семен Оконешников Москва улахан сценаларыгар, Арассыыйа араас куораттарыгар, Румынияҕа, Монголияҕа, Швейцарияҕа, Францияҕа, о.д.а. дойдуларга умнуллубат кэнсиэрдэри биэрбитэ.
Семен Петрович саха опернай искусствота сайдыытыгар бэйэтин бөдөҥ кылаатын киллэрбитэ. Айылҕаттан айдарыылаах, талааннаах, эппиэтинэстээх, таптыыр дьыалатыгар бэриниилээх киһи сырдык уобараһа биһиги сүрэхпитигэр мэлдьи тыыннаах буолуоҕа!
Семен Петрович Оконешниковы кытта бырастыылаһыы 2019 с. бэс ыйын 18 күнүгэр 09.00 ч. Суорун Омоллоон аатынан Государственнай Опера уонна балет тыйаатырыгар ыытыллыаҕа: Ленин пр., 46/1. Бохоруоната Нам улууһун Бөтүн с. буолуоҕа.