Бу күннэргэ оҕолорун сахалыы иитиэн баҕарар төрөппүттэргэ аналлаах “Саха оҕотун төрөөбүт тылыгар уһуйан иитии” I бэстибээлэ буолаары турар. Урукку өттүгэр бу курдук бэстибээл буолбутун өйдөөбөппүн. Маны кимнээх тэрийэллэрий? Ийэ тылларын иитиэхтии сылдьар, оҕолорун сахалыы иитэр төрөппүттэр тэрийэллэр.
“Саха сирэ” хаһыат, edersaas.ru
Биһиги бэлиэтии көрдөхпүтүнэ, билэр дьоммут оҕолорун нууччалыы иитэн эрэллэр диэн тэрийээччилэр этэллэр. Тоҕо, диэн ыйыттахха араас кыһалҕалар баалларын ыйаллар дииллэр. Кинилэргэ сахалыы иитиигэ бэйэбит, атыттар холобурдарын көрдөрүөхпүтүн баҕарабыт, оҕону сахалыы иитиигэ улахан уустук суох, табыллар, атыттартан көрөн үөрэниҥ, оҕолорбутугар тылбытын тиэрдиэххэйиҥ диэн итэҕэтэр санаалаах тэрийэбит диэн быһаараллар.
“Бэстибээли тэрийээччилэр бары ийэлэрбит. Ким эрэ биир оҕолоох, ким эрэ биэс оҕолоох. Биһигини барыбытын оҕолорбутун сахалыы иитии кыһалҕата түмэр. Бэстибээлгэ, уопсайа, отучча тэрилтэ кыттыаҕа. Бырагыраамата киэҥ. Икки хайысханан барыаҕа. Бастакы хайысхаҕа төрөппүттэргэ, исписэлиистэргэ аналлаах лиэксийэлэр, логопедтар, уйулҕа үлэһиттэрин (психологтар), педагогтар сүбэлэрэ киириэхтэрэ. Иккис хайысха аралдьытар аналлаах. Араас маастар-кылаастар, оонньуулар буолуохтара, оонньуу киинэлэри (мультфильм), сахалыы киинэлэри быһа тардан көрдөрүөхпүт”, — диэн тэрийээччилэртэн биирдэстэрэ, дьахталларга аналлаах kerekuo.ru диэн Саха сирин бастакы саайтын салайааччыта Туйаара Алаас санаатын үллэстэр.
Бэстибээл күнү быһа буолуоҕа, хабар ыыра киэҥ. Кэрэхсэбиллээҕэ диэн, төрөппүттэр оҕолорун илдьэ тиийэн көрдөрүөхтэрин сөп. Уруһуйтан саҕалаан, маастар-кылааска, оонньууга тиийэ араас дьарыктар күүтэллэр. Логопедтар, уйулҕа үлэһиттэрэ (психологтар), педагогтар оҕолоргутун көрөн сүбэ-ама биэриэхтэрэ. Сахалыы таҥас биһирэнэр, киириитэ босхо.
Күнэ-дьыла: сэтинньи 3 күнэ (өрөбүл) 2019 сыл.
Буолар сирэ: Дьокуускай куорат, К.Уткин аатынан уул, 5-с нүөмэрдээх дьиэтэ (“Арассыыйа – мин устуоруйам” түмэл)
Людмила ПОПОВА, “Саха сирэ” хаһыат, edersaas.ru