Култуура

Саха норуотун чулуу уолаттарыгар анаммыт быыстапканы кэрэхсээтилэр

А.Е.Кулаковскай аатынан норуоттар доҕордоһууларын дьиэтигэр дьон-сэргэ тоҕуоруста.

Манна Саха АССР тэриллибитэ 100 сылынан уонна Өрөспүүбүлүкэ күнүнэн саха норуотун чулуу уолаттарыгар анаммыт «Великие сыны Якутии» диэн билиини-көрүүнү биэрэр быыстапка бэртээхэйэ буолла. Бу туһунан тустаах тэрилтэ пресс-сулууспата иһитиннэрдэ.

Быыстапкаҕа Национальнай бибилэтиэкэ пуондатыттан Саха автономиятын төрүттэспит саха норуотун чулуу уолаттарын үлэлэрин-хамнастарын кэпсиир бэртээхэй кинигэлэр көрдөрүүгэ уурулуннулар. Манна дьон-сэргэ  улаханнык астынан, долгуйан туран Максим Аммосов, Былатыан Ойуунускай, Исидор Барахов, Степан Аржаков, уо.д.а. тустарынан кинигэлэри көрдүлэр диэн пресс-сулууспа бэлиэтиир. Быыстапканы норуоттар доҕордоһууларын дьиэтин генеральнай дириэктэрэ Антонида Корякина эҕэрдэ тылынан аспыт. Бу үөрүүлээх бэлиэ күн тэрээһинигэр бастакынан Дьокуускай куорат 29 №-дээх оскуолатын үрдүкү кылааһын үөрэнээччилэрэ (дириэктэр Яковлева Марфа Анатольевна) сылдьыбыттар.  СӨ Үөрэҕириитин туйгуна Николай Протасов салайар Хатас орто оскуолатын музыкальнай устуудьуйатын оҕолоро Анжелика Иванова, Аля Долгова уонна  СӨ Култууратын туйгуна Галина Баишева  салайар «Созвездие» ИДьМ бэтэрээннэрин вокальнай бөлөҕө эҕэрдэ ырыаларынан-тойуктарынан быыстапканы ситэрэн-хоторон, киэргэтэн биэрбиттэр. Иһитиннэрбиттэринэн, экспозицияны ыам ыйын 4 күнүгэр диэри норуоттар доҕордоһууларын дьиэтигэр кэлэн көрүөххэ сөп.

Маны сэргэ, бу бэлиэ күн Саха АССР 10 сылыгар анаммыт «Сахам сирин таптыыбын» диэн өйтөн суруйуу өрөспүүбүлүкэтээҕи кэтэхтэн ыытыллыбыт куонкурус кыайыылаахтарын эҕэрдэлээбиттэр. Үлэлэри СӨ норуоттарын Ассамблеятын бэрэссэдээтэлэ Александр Подголов бэрэссэдээтэллээх дьүүллүүр сүбэ, ф.н.к., ЯИВТ доцена Ольга Пашкевич, Дьокуускай куорат 29 №-дээх орто оскуолатын нуучча тылыгар уонна литературатыгар учуутала Сардана Винокурова, 1 категориялаах педагог-иитээччи, суруналыыс, филолог Владислав Коротов көрбүттэр. Куонкуруска барыта 200-тэн тахса өйтөн суруйуу киирбит.

Хаартыскалар А.Е.Кулаковскай аатынан норуоттар доҕордоһууларын дьиэтин пресс-сулууспатыттан.

0
0
Telegram @edersaas20