Төрөөбүт тыл уонна сурук-бичик күнүн көрсө “Бичик” Национальнай кинигэ кыһата өссө биир дьоһуннаах бэлэҕи оҥордо. “Саха сирин суруйааччылара” библиографическай ыйынньык күн cирин көрдө.
edersaas.ru
Ыйынньыкка норуот олоҥхоһуттарын, суруйааччылар уонна саха литературатын устуоруйатыгар биллэр кылааттарын киллэрбит ааптардар олохторун уонна айар үлэлэрин туһунан кылгас сибидиэнньэлэр киирбиттэр.
1963 сылтаан саҕалаан, 5 маннык ыйынньык бэчээттэммитэ (1972, 1981, 1995 сылларга), бүтэһигин 2000 сыллаахха күн сирин көрбүтэ. 20 сыл тухары литератураҕа биллэр уларыйыылар таҕыстылар, суруйааччылар ахсааннара элбээтэ, сонун матырыйааллар булулуннулар, саҥа көрүүлэр баар буоллулар.
Ыйынньыкка үлэлээбит ааптардар эппиттэрин курдук, ХIХ үйэ иккис аҥаарыгар-ХХ үйэ саҥатыгар саха литературатыгар саҥалыы көрүү наада буолбутунан, маннык ыйынньыгы таһаарар кэм кэлбитэ. СӨ Култуураҕа уонна духуобунай сайдыыга министиэристибэ, Саха сирин суруйааччыларын ассоциацията, СӨ Национальнай бибилэтиэкэтэ өйөөн таһаардылар.
Ыйынньык 413 айар куттаах киһи мэтириэтинэн ситэрилиннэ. Ыйынньык урукку таһаарыылартан биир уратытынан репрессияламмыт суруйааччылар тустарынан саҥа матырыйааллар киллэриллибиттэрэ буолла.
Дьоһуннаах үлэни СӨ култууратын үтүөлээх үлэһитэ, Былатыан Ойуунускай аатынан Судаарыстыбаннай бириэмийэ лауреата Валентина Павлова хомуйан оҥордо. Эрэдээксийэлиир кэллиэгийэҕэ суруйааччылар: Олег Сидоров, Наталья Харлампьева, Иван Мигалкин, С.В.Максимова, Татьяна Павлова-Борисова киирдилэр. Матырыйааллары хомуйууга Елена Слепцова-Куорсуннаах, Галина Фролова уонна Л.А.Баишева-Федорова үлэлэстилэр.
“… Билигин бары сыыппараҕа көспүт эйгэ туһунан кэпсиир уонна үлүһүйэр кэмнэригэр маннык ыйынньык тахсара олус кэрэхсэбиллээх. Биһиги күннээҕи олохпутугар литература оруолун уонна суолтатын өссө төгүл санатар уонна тоһоҕолоон бэлиэтиир аналлаах. Бу — ыйынньык эрэ буолбатах, энциклопедия таһаарыыларын курдук, үгэс буолбут академическай кээмэйинэн таҕыста, өссө электроннай көрүҥнээх буолуоҕа. Бу эмиэ олус суолталаах”, — диэн үрдүк сыанабылы ыйынньык аан тылын суруйбут дьонтон биирдэстэрэ, П.Ойуунускай аатынан Судаарыстыбыннай бириэмийэ лауреата, философия наукатын хандьытаата Олег Сидоров үрдүк сыанабылын биэрбит.
708 сирэйдээх дьоһуннаах ыйынньык 1000 ахсаанынан таҕыста, «Бичик» кинигэ кыһатын маҕаһыыннарыгар атыыланар.
Надежда ЕГОРОВА, “Саха сирэ”, edersaas.ru