“Саха” НКИХ Николай Тарскай түһүлгэтин хапсыһыыларын быһа эфиринэн көрдөрүөҕэ
Бүгүҥҥүттэн тоҕус томтордоох Чурапчыга Николай Тарскай кэриэһигэр көҥүл тустууга Саха Өрөспүүбүлүкэтин 63-с чөмпүйэнээтэ саҕаланар. Киэһэ 17-00 чаастан “Саха” НКИХ “Мамонт” ханаалга күрэхтэһии үөрүүлээх аһыллыытын уонна финал аҥарынааҕы хапсыһыылары быһа эфиринэн көрдөрүөҕэ.
Чурапчытааҕы күрэхтэһии Монреаллааҕы Олимпийскай оонньуулар чөмпүйүөннэрэ, аан дойду үс төгүллээх чөмпүйүөнэ, Европа чөмпүйүөнэ Павел Пинигин 65 сааһыгар түбэһиннэрэн ыытыллар. Саха норуотун чулуу уолун чиэстээһин субуотаҕа, кулун тутар 24 күнүгэр, буолуоҕа.
Быйылгы түһүлгэ биир уратытынан Саха сирин норуоттарын VII Спортивнай оонньууларыгар кыттар бастыҥ тустууктары сүүмэрдээһин буолуоҕа. Күрэс түмүгүнэн ыйааһын ахсын 16-лыы бөҕөс аны сайын Аммаҕа ыытыллар күрэхтэһиигэ кыттар быраабы ылыаҕа. Онон сыллата сытыы хапсыһыыларынан уратыланар күрэс күүрээнэ өссө үрдүүрэ күүтүллэр.
“Саха” көрдөрөр-иһитиннэрэр хампаанньа 15 үлэһиттээх бөлөҕө бу күннэргэ Чурапчыга үлэлиир, онон субуоталаах өрөбүлгэ күрэхтэһии хаамыытын толору быһа эфиринэн “Мамонт” ханаалынан сырдатыаҕа. Ону сэргэ тустууну сэргээччилэр күрэс хапсыһыыларын “Саха” НКИХ сайтынан итиэннэ ютуб-ханаалынан көрүөхтэрин сөп.
Николай Тарскай кэриэһигэр көҥүл тустууга Саха Өрөспүүбүлүкэтин 63-с чөмпүйэнээтин бырагыраамата
Кулун тутар 23 күнэ
10:00-16:00 —57, 65, 74, 97 кг ыйааһыннарга барыллаан хапсыһыылар
17:00-17:30 — күрэхтэһии үөрүүлээх аһыллыыта
16:00-18:00 —57, 65, 74, 97 кг ыйааһыннарга финал аҥарынааҕы хапсыһыылар
Кулун тутар 24 күнэ
09:00-16:00 —61, 70, 79, 92, 125 кг ыйааһыннарга барыллаан хапсыһыылар
09:00-17:00 —57, 65, 74, 86, 97 кг ыйааһыннарга эрэхтээх хапсыһыылар
17:00-19:00 —57, 65, 74, 86, 97 кг ыйааһыннарга түмүк хапсыһыылар
19:00-21:00 — Олимпийскай оонньуулар чөмпүйүөннэрэ Павел Пинигини 65 сааһынан чиэстээһин (“Айылгы” СК)
Кулун тутар 25 күнэ
09:00-16:00 —61, 70, 79, 92, 125 кг ыйааһыннарга эрэхтээх хапсыһыылар
13:00-15:00 — түмүк хапсыһыылар, кыайыылаахтары наҕараадалааһын.