«Саха» НКИХ “Азия оҕолоро” кыһыҥҥы оонньуулары быһа эфиргэ көрдөрүөҕэ
ОТВ теле-хампаанньа 2019 сыл олунньутугар Соҕуруу Сахалинскайга ыытыллар “Азия оҕолоро” кыһыҥҥы спортивнай оонньуулары сырдатыытыгар “Саха” национальнай көрдөрөр-иһитиннэрэр хампаанньа көмөлөһүөҕэ.
Бу туһунан сөбүлэһиигэ «Губернские ведомости» бэчээт дьиэтин дириэктэрэ Владимир Семенчик уонна “Саха” НКИХ генеральнай дириэктэрин бастакы солбуйааччы Олег Марков илии баттаатылар.
Бэчээт дьиэтин дириэктэрэ Владимир Семенчик ОТВ маннык улахан тэрээһини аан бастаан сырдатыаҕын этэн туран, “Азия оҕолоро” сайыҥҥы оонньуулары сырдатыыга баай уопуттаах, сөптөөх тиэхиньикэлээх, бэлэмнээх үлэһиттэрдээх “Саха НКИХ бииргэ үлэлэһиигэ саамай табыгастаах партнерунан буоларын ыйда.
“Азия оҕолоро” норуоттар икки ардыларынааҕы спортивнай оонньуулар генеральнай дириэктэрдэрэ Владимир Максимов бу сөбүлэһии Сахалин уобалаһын телевидениетын сайдыы саҥа таһымыгар таһаарыаҕын бэлиэтээтэ.
“Азия оҕолоро” норуоттар икки ардыларынааҕы кыһыҥҥы спортивнай оонньуулар Сахалин уобалаһыгар 2019 сыл олунньу ыйыгар ыытыллыахтара. Барыллаан, 30-ча дойдуттан икки тыһыынчаттан тахса 16-гар диэри саастаах эдэр спортсмен кэлэн күрэстэһэрэ күүтүллэр.
Роман Попов, edersaas.ru
Хаартыска Интэриниэттэн ылылынна