Култуура Саха АССР 100 сыла

Дьокуускайга саха литературатын баала ыытылынна

Дьокуускай 390 сылын чэрчитинэн, “Смарт” бибилэтиэкэ аан бастаан Саха литературатын баалын тэрийдэ. Манна сахалыы таҥастаах, эбэтэр, киэргэллээх эрэ киирэҕин. Дьон-сэргэ сахалыы сайбаччы таҥнан сылдьарын көрүөххэ олус үчүгэй.

Баалга кэлбит дьон сахалыы остуол оонньуутугар, хары баттаһыыга, хоһоону ааҕыыга күрэстэстилэр, быыстапкалары көрдүлэр, Манчаары туһунан лиэксийэни иһиттилэр, сахалыы брошь оҥорор маастар-кылааска сырыттылар.

Белинскэй аатынан кыраайы үөрэтэр бибилэтиэкэ, Ойуунускай аатынан Литературнай мусуой, Ярославскай аатынан история, култуура мусуойа быыстапкалаатылар.

Биир интэриэһинэй тэрээһининэн саха литературатын дьоруойдарын уобарастарын күрэстэрэ буолла. Манна дьэ, көрдүбүт: Саха Саарын Тойону, Сабыйа Баай Хотуну (“Ньургун Боотур” олоҥхоттон), Тыаһааны удаҕаны (“Тыгын Дархан”), Дойду оҕото Дорогуунап Ньукулайы, завуч Надежда Пестрякованы (“Сүрэх тэбэрин тухары”) уонна Өксөкүлээх “Саха дьахталларын сэттэ мэтириэттэрин”.

Бу “Айыы саас” диэн үҥкүү ансаамбылын баабыскалара, этэргэ дылы, былааһы ыллылар. Кинилэргэ киһи 70-85 сааһы хайдах да биэрбэт. Уобарастарын арыйар курдук таҥнан-саптан, кырааскаланан кэлбиттэр, туттан-хаптан, үҥкүүлээн, “сэттэ мэтириэттэрин” уобарастарын толору арыйдылар, оһуохайдаан да ыллылар.

Бу курдук сэргэх тэрээһиннэр куорат олохтоохторугар өссө да буола турдуннар.

Ангелина Васильева, “Саха сирэ” хаһыат, edersaas.ru

Хаартыска: ааптар түһэриитэ.

1
0
Telegram @edersaas20