«Саха Липснеле» табаара «Сделано в ТОР СПВ» диэн бэлиэлэннэ
2021 сыл саҕаланыаҕыттан «Сделано в ТОР СПВ Дальний Восток» бэлиэни өссө үс ТОР резиденнэрэ бэйэлэрин табаардарыгар туруорар бырааптаннылар. «Саха Липснеле», «Комсомольская» куурусса пиэрмэтэ уонна урбаанньыт Алексей Корепов оҥорор бородууксуйаларын бу табаарынай бэлиэнэн киэргэттилэр.
«Саха Липснеле» өр кэмҥэ ититэр оһохторун билигин Саха сиригэр эрэ буолбакка, тас эрэгийиэннэргэ ситиһиилээхтик батарар. Хампаанньа «Сделано в ТОР и СПВ Дальний Восток» бэлиэлээх оһохторун бэлиэр атын куораттарга атыыга ыыппыт. Оҥорон таһаарар хампаанньа салайааччыта Пуд Тимофеев этэринэн, атыылыыр бэрэстэбиитэллэр хаһыс да сылын Санкт-Петербург, Новосибирскай, Улан-Удэ уонна Иркутскай куоракка ситиһиилээхтик үлэлииллэр. Өймөкөөҥҥө тургутуллубут оһохтору тымныы кыһыннаах дойду дьон бэркэ сэргээн атыылаһаллар эбит. “Арассыыйаҕа эрэ буолбакка, Казахстаҥҥа уонна Монголияҕа биһиги оһохторбутун атыылаһаллар”, — диэн кэпсиир ТОР резиденин салайааччыта.
Сотору кэминэн өссө алта хампаанньа бу бэлиэни табаардарыгар туруорар быраабы ылар былааннаахтар. Балыгы астыыр, киэргэли, тутуу матырайаалын оҥорор, биирдэ туттуллар иһиттэри, мааскалары, бахилалары, бөх таһар бакыаттары оҥорор тэрилтэлэр бу дьаралыгы туруорунан табаардарын батарыытыгар эбии реклама оҥостуохтара.
Санатан эттэххэ, «Сделано в ТОР СПВ Дальний Восток» табаарынай бэлиэ Табаар уонна өҥө аан дойдутааҕы классификациятын 45 кылааһыгар сөп түбэһэрин туһунан анал регистрацияны ааспыта. Бу бэлиэни ТОР резиденнэрэ эрэ ылар бырааптаахтар. Табаарынай бэлиэ Уһук Илиҥҥэ уонна Саха сиригэр оҥорон таһаарар хампаанньалар сайдалларыгар уонна тас сирдэргэ биллэр буолалларыгар көмөлөһөргө ананан оҥоһуллубута.
«Саха сирэ» хаһыат, edersaas.ru