Саха сириттэн сылдьар этно-толорооччу Аэлита Ершова сарсын, ахсынньы 13 күнүгэр, «Россия» ханаал ыытар «Синяя птица» диэн оҕо талаанын куонкуруһугар кыттыаҕа.
15 саастаах саха кыысчаана дойдуга киэҥник биллэр битбоксер Вахтанг диэн толорооччуну кытта хомуска оонньуоҕа.
Аэлита Ершова «Арктика куолаһа» аан дойдутааҕы бэстибээл кыайыылааҕынан буолар. Эдэр талаан «Добун» этно-фольклорнай кэллэктиип солиһа, итиэннэ «Айархаан» хомус академиятыгар дьарыктанар эбит. Салайааччытынан Саха сирин үтүөлээх артыыһа, виртуоз-хомусчут Альбина Дегтярева буолар.
«Синяя птица» куонкурус сүрүн бирииһэ — биир мөлүйүөн солкуобай. Куонкуруска Арассыыйа бары муннугуттан кэлбит артыыстар күрэхтэһэллэр. Кинилэри дойду биллэр артыыстара — Сергей Безруков, Николай Цискаридзе, Дима Билан уонна Денис Мацуев дьүүллүөхтэрэ.
Биэриини сарсын, ахсынньы 13 күнүгэр, киэһэ 18.15 чаастан «Россия» ханаалга көрүҥ.
edersaas.ru