Жатайга бэрт элбэх дьоһун-мааны саха ыала олорор. Дьааҥы Арыылааҕыттан төрүттээх Татьяна 2007 сыллаахха Жатайга Винокуровтарга кийиит буолан кэлбит. Кэргэнин дьоно ааспыт үйэ 70-с сылларыттан манна олохсуйбуттар.
Эбээлэрэ Надежда Константиновна оҕо саадыгар медицинэ сиэстэрэтинэн үлэлээбитэ. Эһээлэрэ Василий Елисеевич үйэтин тухары навигацияҕа таһаҕас тиэйиитигэр сылдьыбыта, суудуна мэхээнньигэ этэ. Кини аатынан танкер ааттаммыта. Винокуровтар аҕаларын аатын кэриэстээн, сыл ахсын бириэмийэ олохтууллар.
Татьяна Васильевна культуролог идэлээх. Уонтан тахса сыл Национальнай художественнай мусуойга үлэлээбит. Кэргэн тахсан, оҕолонон баран, Жатайга көһөн кэлиэҕиттэн, олохтоох дьаһалта култуураҕа салаатын начаалынньыга. Кэргэнэ Александр Васильевич — Жатай мусуойун дириэктэрэ. Винокуровтар кыыс уонна уол оҕолоохтор.
«Оҕо үөрэнэригэр, эт-хаан өттүнэн сайдарыгар усулуобуйа барыта баар. Поликлиника, сайыҥҥы лааҕыр үлэлиир. Араас омук оҕолоро мустан, бары иллээхтик бииргэ дьарыктаналлар. Санааргыырым диэн, оҕолорбут сахалыы саҥарбаттар, Аҕабыт эмиэ нууччалыы үөрэммит.
Саҥа оройуоҥҥа чааһынай дьиэ тутуута сайдан, тыа сирдэриттэн көһөн кэлии элбээн эрэр. Култуура киинигэр оҕолору хомуска үөрэтэллэр. Үһүс сылын Олоҥхо ыһыаҕар кыттабыт», — диэн санаатын үллэстэр дьиҥ сахалыы куттаах Татьяна Васильевна.
Тус бэйэм Жатайы олус сөбүлээтим, куорат дьалхааныттан тэйиччи, чөкө сиргэ олохсуйарга усулуобуйа барыта баар. Эдэр ыаллары, бүддьүөт үлэһиттэрин дьиэнэн хааччыйарга олохтоох дьаһалта күүскэ ылсан үлэлэһэр. Дьиэлэр бары сэргэх, саҥа, аныгылыы оҥоһуулаахтар, тула өттүлэрин сибэкки киэргэтэр. Аны аҕыйах сылынан собуот аһылыннаҕына тыһыынчанан кэриҥэ киһи үлэлии кэлиэ, онтон саатар аҥаарыгар саха дьоно харса суох ылсан үлэлээтэҕинэ, олоҕун уйгута тупсуо этэ.
Марианна Тыртыкова, «Саха сирэ» хаһыат, edersaas.ru