Кэнники сылларга нэһилиэнньэҕэ чөл олоҕу тутуһуу чэрчитинэн дьахталлар саха үҥкүүтүн доҕуһуолунан хамсаныылара тыа сирин дьахталларыгар улахан болҕомтону тарта.
edersaas.ru
Ол да иһин, “Эгэй-Сэгэй” сахаэтнофитнес бырайыак кыттыылаахтарын чугастааҕы улуустарга олус кэтэһэр буоллулар. Бу туһунан бырайыак кыттыылааҕа Раиса Горохова бу курдук кэпсиир:
— Биһиги улуустарынан сылдьан чөл олоҕу пропагандалыыбыт. Ол курдук, соторутааҕыта биир сааскы сарсыарда саҥа күн сардаҥаларын ыһыыта, “Эгэй-Сэгэй” сахаэтнофитнес аҕыс киһилээх бөлөҕө айаҥҥа туруннубут. Сорукпут — Хаҥалас улууһун Улахан Аан уонна Тиит Арыы кэрэ аҥаардарыгар эти-сиини эрчийэн, кинилэр дууһаларын уһугуннаран, төрүт эйгэни кытта ситими аһан, киһи ис туругун тупсарарга анаммыт бырайыакпытын билиһиннэрии, маастар-кылаас ыытыы уонна сибээс олохтооһун. Аара Хаҥалас улууһун бэлиэ сирдэригэр тохтоон, хаартыскаҕа астына түстүбүт.
Мария Егорова уонна Надежда Исакова биһиэхэ төрөөбүт дойдуларын кэрэ сирдэрин ис дууһаттан киэн тутта кэпсии, билиһиннэрэ истилэр. Суолбут икки өттүнэн араас мас — күөх бэстэн саҕалаан, сылаас кэлэн иһэриттэн уһукта быһыытыйбыт нарын хатыҥынан, онтон тиит маһынан солбуллан, элэҥнэһэн аастылар.
Оннооҕор аара суол кытыытыгар аар тайҕа мааны кыыла – тайах тохтоон, ыксаабакка одуулаһан, биһигини эҕэрдэлээбиттии көрөн ааста. Ити барыта ыраах айаммытын чугаһатан, биллэрбэккэ, сотору Улахан Аан “Аан Аартык” диэн ааттаах култуура киинин дьиэтигэр тиийэн кэллибит. Биһигини олохтоох уон биир Далбар хотун сахалыы муусукаҕа, сахалыы үҥкүү хамсаныыларын умсулҕаннаах дьарыгар кыттаары, мааны халадаай ырбаахыларын сайбаччы таҥнан көрүстүлэр. Бастаан дьарык туһунан билсиһиини Надежда Павлова ыытта. Онтон төгүрүччү туруоран, нарын хамсаныытынан батыһыннаран, этнофитнес дьарыгын ыытта.
Бу кэмҥэ хомус аптаах тыаһыттан саҕалаан, бэйэ омугун үҥкүүтүн кистэлэҥ хамсаныыларын, саха муусукатын дорҕооннорун уонна таҥаһын дьүөрэлэһиилэринэн дууһабытыгар ыраас иэйиини уһугуннарда, айыылардыын ситимнээтэ, үөрүүнү аҕалла.
Онтон куораттан тиийбит ыалдьыттар Тиит Арыытааҕы “Эркээйи “култуура киинигэр эмиэ сахалыы үҥкүү хамсаныытынан маастар кылаас ыыппыттар.
— Елена Кельбинова салайааччылаах “Ситим” үҥкүү бөлөҕүн кытта истиҥ көрсүһүү олус бэркэ ааста. Киһи үөрэрэ – үҥкүүнэн эрчиллии кэннэ үөрбүт харахтар, астынар тыллар, бэйэ бөлөҕүн хайдах тэринэр, салайааччы булунан куоракка инструктордары бэлэмнээһин туһунан кэпсэтии таҕыста. Ол курдук, Елена Кельбинова: “Үҥкүүлүүр баҕабыт баһаам эрээри, анал тдэлээх хореографпыт суох, онон үҥкүүгэ дьоҕурдаах дьону көрдөһөн үөрэттэрэ сатыыбыт. Бэйэбит тус баҕабытынан үҥкүүлүүбүт», — диэн санаатын үллэһиннэ. Онон тыа сиригэр маннык хамсаныылары үөрэтэн, дьон хаһан баҕарар бэйэлэрэ эбии хамсаныылары толкуйдаан, бэртээхэй үҥкүүнү бэлэмниэхтэрин сөп.
Биһиги, ыраах айаммыт кэнниттэн тилэх баттаһан, сылдьыбыт сирдэрбититтэн хаҥаластар «Тэтим» саха араадьыйатын нөҥүө махтал тылларын ыыппыттара олуһун үөртэ: «Наһаа үчүгэй уонна көдьүүстээх, санааны өрө көтөҕөр, саха төрүт хамсаныыларыгар олоҕурбут эрчиллиилэр эбит. Үтүө дьыаланы киин куораттан анаан кэлэн тарҕата сылдьар “Эгэй-Сэгэй” сахаэтнофитнес бырайыак кыттааччыларыгар барҕа махтал!“.
Ити курдук,»эгэй-сэгэйдэр» ыытар үлэлэрэ, таптыыр дьарыктара норуокка тарҕанан, бэйэлэрин кэккэлэрэ хаҥыырыгар кыһаналлара кэрэхсэбиллээх. Кинилэр кэннилэриттэн төһөлөөх элбэх ыал ийэтин санаата сырдаан, ырааһыран, үөрүүтэ үксүүрэ буолуой? Хас биирдии киһи муҥура суох ис кыаҕын арыйар үтүө дьарыктаах дьоҥҥо уопсастыбаннай үлэлэригэр өөсө да үгүс ситиһиини баҕарабыт.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Аркадий Новиков түһэриитэ.