Сүбэһит

Саха интэриниэт-маҕаһыына бэйэ бородууксуйатын батарар

Билигин бэйэ табаарын оҥорон таһаарыы кэмигэр (импортозамещение) Саха сирин урбаанньыттарын оҥоһуктарын, бородууксуйаларын Арассыыйа араас эрэгийиэннэригэр интэриэһиргиир буоллулар.

Онуоха иһитиннэрэр-биллэрэр саайтар өйөбүллэрэ улахан. 2020 сыл балаҕан ыйын саҥатыгар куйаар ситимигэр Etp14.ru биир кэлим эргиэн былаһааккатын портала аһыллыбыта. Бу араас хайысхаҕа үлэлиир Саха сирин урбаанньыттарын бородууксуйаларын батарыы биир көрүҥэ буолар. Интэриниэт-маҕаһыын «Туризм» салаатыгар “Ханна сынньаныахха?” диэн интэриэһиргиир дьоҥҥо сыанатын ыйан туран, Саха сирин араас сирдэригэр ханнык туристическай баазаҕа сынньаныахха сөбүн туһунан иһитиннэрии-ыйынньыгы булан ылыахха сөп.

Бу саайтка өрөспүүбүлүкэ 89 олохтоох табаары оҥорооччулара 500-тэн тахса бородууксуйаны киллэрбиттэр. Саха сиригэр билигин бэйэ табаарын оҥорон таһаарыы кэмигэр «SOLKO», «Кэрэ» ателье, «Саха чэйэ» хампаанньа, саха-бохо былааччыйалара, “Сото”, “Кэҥкэмэ”, “Сата”, “Хороту”, “Өймөкөөн Киһилээхтэрэ”  уо.да.а. туристичесай комплекстар, туһаайыылар (маршрут) үгүс дьону, туриһы интэриэһиргэтэр буоллулар.

Онон Etp14.ru саайтка киирэн, үгүс туһалааҕы бэйэҕитигэр булуоххут. «Саха сиригэр оҥоһулунна» маркетплейс  СӨ Предпринимательствоҕа, эргиэҥҥэ уонна туризмҥа министиэристибэтин уонна «Мин биисинэһим» автономнай тэрилтэ киин холбоһуктаах бырайыактарынан буолаллар.

 

Елена ПОТОЦКАЯ, «Саха сирэ» хаһыат.

 

0
0
Telegram @edersaas20