Новгород уобалаһыгар саха буойуттарын сырдык кэриэстэригэр Ильмень күөлү эргийэ сүүрэллэр.
РФ Бэрэсидьиэнин иһинэн үлэлиир СӨ Бастайааннай бэрэстэбиитэлистибэтиттэн иһитиннэрбиттэринэн, бу бырайыагы көҕүлээччи Дмитрий Горохов Дьокуускайга Умуллубат уоттан саҕыллыбыт факелы Наговскай баһылыгар Виктор Бучацкайга туттарбыт уонна Саха сириттэн илдьибит буорун саллааттар көмүс уҥуохтара көтөҕүллүбүт сиригэр уурбут. Салгыы РФ Бэрэсидьиэнин иһинэн үлэлиир СӨ Бастайааннай бэрэстэбиитэлин солбуйааччы Юрий Кравцов, СӨ Бастайааннай Бэрэстэбиитэлистибэтин иһинэн уопсастыбаннай сэбиэт чилиэнэ Сергей Сидоров, спортсменнар уонна уопсастыбанньыктар саха буойуттарыгар, бэргэн ытааччылар өйдөбүнньүктэригэр сибэкки дьөрбөтүн уурбуттар.
Сүүрүү бастакы түһүмэҕэ Улуу Новгородка түмүктэммит. Саха сирин дьонун-сэргэтин Павел Неженко салайааччылаах «NovgorodRun» сүүрүү кулуубун кыттыылаахтара өйөөбүттэр. Кинилэр Улуу Новгород устун сүүрбүттэр. Спортсменнар 1941-1945 сылларга Аҕа дойду уоттаах сэриитигэр сырдык тыыннарын толук уурбут буойуттары кэриэстээн саҥата суох соҥуоран турбуттар, Умуллубат уокка сибэкки уурбуттар.
«Бу сүүрүүгэ Саха сириттэн уонна Новгородтан кыттыбыттара улахан суолталаах. Эһиги бэйэҕитинэн холобур буолаҕыт, устуоруйаны билэргэ ыҥыраҕыт, успуорка сыһыараҕыт«, — диэн Улуу Новгород дьаһалтатын физкултуураҕа уонна успуорка управлениетын начаалынньыга Илона Медведева санаатын үллэстибит.
«Биһиги Улуу Кыайыы 76 сылыгар уонна Саха сирин комсомолун 100 сылыгар бу сүүрүүнү анаан тэрийбиппит. Быйылгы сүүрүүгэ кыттааччы элбэх. Сүүрүү көхтөөх», — диэбит Дмитрий Горохов.
Дмитрий Горохов – чөл, чэгиэн олоҕу тарҕатааччы, СӨ физкултууратын уонна успуордун үтүөлээх үлэһитэ. Быйыл кини хамаандатыгар сүүрүү кулууптарын чилиэннэрэ уонна уопсастыбанньыктар: Виктория Баишева, Анна Егорова, Ульяна Яковлева уонна Тимофей Пустоляков кытталлар.
Спортсменнар Ильмень күөлү эргийэ факеллаах 264 км сүүрэллэр. Сүүрүү ыам ыйын 7 күнүгэр Устрека дэриэбинэтигэр саха буойуттарын пааматынньыгар түмүктэнэр. Түмүктүүр түһүмэххэ Старорусскай оройуонуттан 40-тан тахса оскуола үөрэнээччитэ , Петербургтан уонна Саха сириттэн дэлэгээссийэлэр кытталлар.