Ахсынньы 4 күнүгэр Тверскэй уобалас Холм-Березуйскай сиригэр саха буойуннарыгар өйдөбүнньүк арылынна. Арыллыы сиэригэр-туомугар СӨ Бастайааннай бэрэстэбиитэлистибэтин чилиэннэрэ, Тверскэй уобалас Зубцовскай оройуонун салайааччылара, волонтердар, олохтоохтор кыттыыны ыллылар.
edersaas.ru
Бу өйдөбүнньүк 1942 сыллаахха сэтинньи 25 күнүттэн ахсынньы 17 күнүгэр диэри 326-с стрелковай дивизия састаабыгар кырыктаах кыргыһыыга кыттыбыт саха саллааттарыгар ананар.
Дивизия Москва анныгар ньиэмэс фашистарын утары кыргыһыыга кыттыбыта. Үрдүкү хамаандалааһын толкуйунан, кыргыһыы Тверь үс дэриэбинэтин (Гредякино—Холм Березуйскай—Васельки) аттыларыгар буолуохтаах эбит. Уоттаах кыргыһыы кырыктаах тыыныттан бу үс дэриэбинэ кэнники сатаан чөлүгэр түспэтэхтэр.
Бу кыргыһыыга Сэбиэскэй Сойуус бары эрэгийиэннэриттэн, өрөспүүбүлүкэлэриттэн, ол иһигэр Саха сириттэн кыттыбыттар.
Өлбүттэр испииһэктэригэр Өлүөхүмэ улууһуттан 49 киһи баар, Сунтаартан – 30 киһи, Ленскэйтэн — 17 киһи, Тааттатан 5 киһи, Дьокуускай куораттан — 2 киһи. Бу испииһэк өссө да бүтэһиктээх буолбатах.
edersaas.ru