Олунньу 26 – кулун тутар 2 күннэригэр Ижевскэйгэ федеральнай уокуруктар икки ардыларыгар боксаҕа Арассыыйа хамаанданан Кубога буолар.
edersaas.ru
Бу күрэхтэһиигэ хамаандаттан сүүрбэччэлии боксер кыттар – ыйааһын аайы иккилии киһи. Онон Удмуртия киин куоратыгар 400-чэ боксер кэлэрэ күүтүллэр.
Арассыыйа Кубогар Уһук Илиҥҥи уокурук чиэһин үс саха спортсмена көмүскүө диэн буолар. Ол курдук, барыллааһын дааннайынан, 52 киилэҕэ диэри ыйааһыҥҥа Николай Матвеев, Николай Григорьев уонна 60 киилэлээхтэргэ Михаил Варламов сүүмэрдэммит хамаанда састаабыгар киирдилэр.
Ону сэргэ, Сибиирдээҕи уокуруктан саха боксаҕа оскуолатын өссө үс иитиллээччитэ — Петр Прокопьев (49 кг), Дьулус Яковлев (52 кг) итиэннэ Артур Ложников (52 кг) Ижевскэй рингэтигэр күрэстэһиэхтэрин сөп. Бу күннэргэ Новосибирскайга ыытылла турар Александр Невскэй Кубогын күрэхтэһиитин кэнниттэн ол чопчу биллиэҕэ.
Дойду Кубогын бириискэ пуондата үс мөлүйүөн солкуобай. Бастаабыт хамаанда 1,5 мөлүйүөнүнэн, иккис – 1 мөлүйүөнүнэн, үһүс буолбут 500 тыһыынча солкуобайынан биһирэниэҕэ.
Былырыыҥҥы күрэс кыайыылааҕынан Приволжскай уокурук хамаандата буолбута. Сибиирдээҕи – иккис, Ураллааҕы үһүс бириистээх миэстэлэргэ тахсыбыттара. Манна даҕатан эттэххэ, кыайыылаах уокурук Арассыыйа чөмпүйэнээтигэр эбии уон миэстэни ылар.
Роман Попов, edersaas.ru
Хаартыска Интэриниэттэн ылылынна.