Ирландияҕа ыытыллыбыт норуоттар икки ардыларынааҕы күрэхтэһиигэ саха боксердара Арассыыйа сүүмэрдэммит хамаандата кыайыылаах тахсарыгар бэйэлэрин кылааттарын киллэристилэр. Бу туһунан “Спорт Якутии” сайт иһитиннэрэр.
Роман ПОПОВ, «Саха сирэ» хаһыат, edersaas.ru
Ирландия киин куоратыгар Дублиҥҥа Франция, Италия, Германия, Ирландия уонна Арассыыйа хамаандалара кыттыылаах «International Elite Round Robin-2017» норуоттар икки ардыларынааҕы матчевай көрсүһүү түмүктэннэ. Онно Арассыыйа сүүмэрдэммит хамаандатын састаабыгар Саха сирин бокска оскуолатын икки иитиллээччитэ – Василий Егоров уонна Айтал Дьяконов — киирэн кытыннылар.
49 киилэлээхтэргэ аан дойду чөмпүйэнээтин үрүҥ көмүс призера, Европа чөмпүйүөнэ Василий Егоров Дублиҥҥа үстэ кииристэ: бастаан рингэ хаһаайынын Блейн Доббинсы (5:0), онтон салгыы Салах Ибраимы (4:1) хотуталаата. Үһүс киирсиитигэр итальянец Федерико Серреҕа 1:4 ахсаанынан сабырыйтарда.
Уолаттарга уонна ыччаттарга дойду күрэхтэһиилэрин кыайыылаахтара Айтал Дьяконов 64 киилэҕэ диэри ыйааһыҥҥа Ирландия боксердарын кытта күөн көрүстэ: бастакытыгар Уэйн Келлини (4:1) баһыйа тутан баран, салгыы Шон Маккомбҥа хоттордо – ахсаан 1:4.
Манна даҕатан эттэххэ, бу иннинэ Айтал Дьяконов уонна Василий Егоров Финляндияҕа ыытыллыбыт норуоттар икки ардыларынааҕы күрэхтэһии кыайыылаахтарынан буолбуттара.
Ирландияҕа уолаттары кытта тренердэрэ Артур Пахомов уонна Владимир Павлов бииргэ сылдьан сүбэ-ама буоллулар.
Билигин боксердар Кисловодскайга Европа чөмпүйэнээтигэр бэлэмнэнэр сборга сылдьаллар.
Роман ПОПОВ, «Саха сирэ» хаһыат, edersaas.ru