Саха спордун историятыгар аан дойду түһүлгэтигэр түөрт боксер кыттыыны ылбыта. Ол курдук, араас кэмнэргэ Александр Михайлов, Георгий Балакшин, Афанасий Поскачин уонна Василий Егоров аан дойду ааттаахтарын кытта тургутуһан көрбүттэриттэн, үстэрэ дойдуларыгар илии тутуурдаах төннүбүтэ.
Аан бастакынан суолу Александр Михайлов солообута. Кини 1978 сыллаахха Югославия киин куоратыгар Белградка буолбут аан дойду түһүлгэтигэр кыттан, боруонса мэтээли ылары ситиспитэ. Үөһээ Халыма Арыылааҕын ыччата 51 киилэҕэ диэри ыйааһыҥҥа кыттыыны ылбыта.
Бастакы киирсиитигэр кини финал 1/8 түһүмэҕэр Наронг Пимпаван диэн Таиланд боксерун нокаут ыыппыта. Финал чиэппэригэр Михайлов бастакы рауҥҥа Майкл Фельдены (АХШ) үстэ нокдаун ыытан, быһа кыайыыны ситиспитэ. Финал аҥаарыгар Александр Михайлов, хомойуох иһин, Хенрик Средницкий диэн Польша боксеругар хотторон, үһүс бириистээх миэстэҕэ тиксибитэ. Бу саха боксердарыттан аан дойду таһымыгар бастакы улахан ситиһии этэ.
Александр Михайлов көрдөрүүтүн 23 сыл буолан баран, 2001 сыллаахха Белфаст куоракка (Хотугу Ирландия) Георгий Балакшин хатылаабыта. Кини эмиэ 51 киилэҕэ диэри күрэхтэспитэ. Ньурба ыччата уочаратынан Мебарек Солтани (Алжир), Богдан Добреску (Румыния) кыайбыта. Финал аҥаарыгар Украинаттан сылдьар Владимир Сидоренкоҕа хотторон, үһүс бириистээх миэстэни хааччыммыта.
Георгийы кытта Белфастка аан дойду түһүлгэтигэр Бүлүүттэн төрүттээх Афанасий Поскачин (54 киилэҕэ диэри) кыттыыны ылбыта. Бастакы киирсиитигэр кини Виталий Тайберты (Германия) кыайбыта. Иккискэ Чотипат Вонгпратес (Таиланд) утары хотторуу хомолтотун билбитэ. Бу кэнниттэн Георгий Балакшин 2003 сыллаахха Таилаҥҥа, 2005 сыллаахха Кытайга, 2007 сыллаахха Чикагоҕа (АХШ) аан дойду чөмпүйэнээттэригэр кыттыыны ылбыта, ол гынан баран, мэтээлгэ тиксибэтэҕэ.
2015 сыллаахха Катарга Мэҥэ Хаҥалас Харатыттан сылдьар Василий Егоров саха боксатыгар муҥутуур көрдөрүүнү ситиспитэ. Кини кыһыл көмүс мэтээл иһин киирсиигэ Йоаннис Аргилагос диэн Куба боксеругар кыһыылаахтык хотторбута эрээри, ыалдьааччыларыгар үчүгэй эрэ өйдөбүлү хаалларбыта.