Боксаҕа аан дойду чөмпүйэнээтэ Германия Гамбург куоратыгар атырдьах ыйын 25 – балаҕан ыйын 3 күннэригэр ыытыллар. Быйылгы күрэхтэһиигэ 85 дойдуттан 279 боксер, ол иһигэр былырыыҥҥы Рио-де Жанейротааҕы Олимпийскай оонньуулар 18 призердара кыттар.
Саха сирин боксаҕа оскуолатын иитиллээччитэ, норуоттар икки ардыларынааҕы кылаастаах спорт маастара, 23 саастаах Василий Егоров аан дойду чөмпүйэнээтигэр 49 киилэҕэ диэри ыйааһыҥҥа киирсиэҕэ. Тириэньэрэ Артур Пахомов суруналыыстарга иһитиннэрбитинэн, Василий Гамбурга иллэрээ сыллааҕы көрдөрүүтүн тупсарар соруктаах.
Санатар буоллахха, Мэҥэ Хаҥалас Хара нэһилиэгиттэн төрүттээх биир дойдулаахпыт Василий Егоров дойду, Европа икки төгүллээх чөмпүйүөнүнэн (2015, 2017), аан дойду 2015 сыллааҕы үрүҥ көмүс призерунан буолар.
Күрэхтэһии бастакы күнүгэр, атырдьах ыйын 25-гэр, «Sporthalle Hamburg» аренаҕа 49 киилэҕэ диэри ыйааһыҥҥа барыллаан киирсиилэр саҕаланыахтара. Атырдьах ыйын 29-гар – финал чиэппэринээҕи, 31 чыыһылаҕа – финал аҥарынааҕы уонна балаҕан ыйын 2 күнүгэр кыайыылааҕы быһаарар түмүк киирсиилэр буолуохтара.
Боксердар сарсыардааҥҥы күөн көрсүһүүлэрэ Дьокуускай бириэмэтинэн киэһэ 9 чаастан, киэһээҥҥилэрэ түүн 2 чаастан саҕаланыахтара. Боксаны сэҥээрээччилэр киирсиилэри чөмпүйэнээт официальнай сайтыгар киирэн көрүөхтэрин сөп. «Матч! Боец» ханаал Гамбуртан быһа репортаһы биэриэҕэ.
Роман ПОПОВ, “Саха сирэ” хаһыат, edersaas.ru