Мэҥэ улууһун Тараҕай нэһилиэгин сис баайа Федор Маркович Слепцов төрөппүт уола Михаил Слепцов 1905-1911 сс. Москваҕа алта сыллаах тыа хаһаайыстыбатын орто оскуолатын бүтэрэн, салгыы тыа хаһаайыстыбатын институгар (сэбиэскэй кэмҥэ К.А.Тимирязев аатынан тыа хаһаайыстыбатын академията) үөрэммит. Ити кэмҥэ кэргэннээх эбит, икки оҕото Москваҕа төрөөбүттэр.
Үөрэҕин бүтэрэн, 1916 с. үрдүк үөрэхтээх агроном идэтин ылан, Саха сиригэр кэлэн үлэтин агрономическай хамыыһыйа сүөһү иитиитигэр ыстаарсай инструкторынан саҕалаабыт. Ити сыл күһүнүгэр Чурапчыга сүөһү уонна сылгы быыстапкатын тэрийбит.
Сэбиэскэй кэмҥэ баай төрүттээҕиттэн дьаахханан эбитэ дуу, биллэ-көстө сатаабатах, улахан дуоһунаска тардыспатах. Аҕа дойду Улуу сэриитин иннигэр Сэргэлээххэ, билигин Медкиин турар хонуутугар, уопутунай ыһыылардааҕа үһү.
Саха бастакы үрдүк үөрэхтээх агронома Михаил Федорович Слепцов 1970 с., 82 сааһыгар сырдык тыына быстыбыт. Кыра кыыһа Галина Слепцова-Макарова аҕатын суолун батыһан К.А.Тимирязев аатынан Тыа хаһаайыстыбатын академиятын ситиһиилээхтик бүтэрэн, сааһын тухары Дьокуускайдааҕы тыа хаһаайыстыбатын техникумугар үлэлээбитэ, “САССР үтүөлээх учуутала» буолбута. Галина Михайловна устудьуоннар куттарын туппут талааннаах учуутал, дьоҕурдаах салайааччы этэ. Лиэксийэ ааҕар кэмигэр сахсырҕа кынатын тыаһа эрэ сырдырҕыыр чуумпута бүрүүкүүрэ, эдэр дьон мэктиэтигэр тыыммакка олорон истэллэрэ, суруналлара. Тутта-хапта сылдьарыгар, сирэйигэр-хараҕар төрүт киһи төрүөҕэ буолара көстө сылдьара.
Максим АФАНАСЬЕВ,
экономика наукатын кандидата.