Бу күннэргэ Улан-Удэ куоракка балет артыыстарын I Российскай-Евразийскай куонкурустара түмүктэннэ.
edersaas.ru
Бу улахан суолталаах күөн күрэскэ Кытайтан, Японияттан, Монголияттан, Сингапуртан уонна Арассыыйа эрэгийиэннэриттэн 150 киһи кытынна. Бу киэҥ далааһыннаах куонкуруска Суорун Омоллоон аатынан опера уонна балет тыйаатырын артыыһа Валерий Аргунов III истиэпэннээх лауреат аатын ылла уонна анал дипломунан, боруонса мэтээлинэн наҕараадаланна.
— Балет артыыһа “Корсар», «Венецианскай карнавал», «Раймонда», «Эсмеральда», «Щелкунчик» балеттартан араас вариациялары ситиһиилээхтик толордо. Ону таһынан, кини РФ уонна СӨ үтүөлээх артыыһа Екатерина Тайшина туруоруутугар “Ойуун» нүөмэрин толорбута биһирэбили ылла.
Сотору кэминэн Валерий Аргунов Суорун Омоллоон аатынан опера уонна балет тыйаатырыгар бастакы сезонун түмүктүөҕэ. Кини 2017 сыллаахха Москватааҕы хореография судаарыстыбаннай академиятын ситиһиилээхтик бүтэрбитэ. Ол сыл К. Станиславскай уонна В. Немирович-Данченко ааттарынан академическай музыкальнай тыйаатырга балет артыыһынан биир сыл үлэлээт, төрөөбүт дойдутугар эргиллибитэ. Билигин тыйаатыр сценатыгар А. Адан “Корсар» балетыгар — Раб Али, Л. Минкус «Дон Кихот» балетыгар — Эспада оруолларын, П. Чайковскай «Кубалаах күөлүгэр» па де труа үҥкүүлүүр, — диэн иһитиннэрэр тыйаатыр пресс-сулууспатын үлэһитэ Николай Свешников.
Ити курдук, балет артыыһа Валерий Аргунов Тыйаатыр сылыгар балет артыыстарын I Российскай-Евразийскай куонкурустарыгар чаҕылхай ситиһиитэ төрөөбүт Сахатын сиригэр дьоһуннаах бэлэҕинэн буолла.
Елена ПОТОЦКАЯ, “Саха сирэ” хаһыат, edersaas.ru