Саха бааһынайдара, кэпэрээтэрдэрэ улахан сугулааҥҥа бараары бэлэмнэнэллэр
Саха сирин фермердэрэ Россия бааһынай хаһаайыстыбаларын уонна кэпэрэтииптэрин ассоциациятын (АККОР) XXIX сийиэһигэр иккистээн хомунан, бараары тэринэллэр. Тоҕо диэтэххэ, маҥнай былааннаммыт улахан мунньах быыбар иннинэ дойду бэрэсидьиэнэ Владимир Путин Краснодарга АПК үлэһиттэрин кытта көрсүһэр буолбутуттан сиэттэрэн кэлиҥҥи кэмҥэ көһөрүллүбүтэ.
edersaas.ru
Сийиэс Москваҕа ыам ыйын 15-16 күннэригэр ыытыллыаҕа. Онно Саха сиринээҕи АККОР бэрэсидьиэнэ Александр Артемьев салалтатынан 20 киһилээх дэлэгээссийэ кыттыаҕа. Бу сырыыга кэпэрэтииптэр салайааччылара хото киирбиттэр: Таисия Десяткина (Мэҥэ Хаҥалас, “Тумул” ТХПК), Владимир Егоров (Сунтаар, “Кириэстээх” ТХПК), Екатерина Портнягина (Дьааҥы, “Полюс холода” ТХПК), Михаил Петров (Таатта, “Победа” ТХПК), о.д.а. Сийиэс үлэтигэр өрөспүүбүлүкэ аатыттан тыа хаһаайыстыбатын уонна ас-үөл бэлиитикэтин миниистирэ Александр Атласов, миниистири солбуйааччы Николай Петров, АПК үлэһиттэрин идэлээх сойуустарын бэрэссэдээтэлэ Борис Николаев, Россия Аграрнай партиятын Саха сиринээҕи салаатын салайааччыта Александр Васильев, Тыа сирин дьахталларын сойууһун салайааччыта Зарема Бочкарева, Эдэр фермердэр түмсүүлэрин салайааччыта Татьяна Скрябина кыттыахтара. Онон улахан мунньахха күүстээх хамаанда тоҕу анньан тиийиэҕэ.
Манна сыһыаран иһитиннэрдэххэ, Москваҕа ыам ыйын 28 күнүгэр АККОР аан дойдутааҕы VI сийиэһэ ыытыллара күүтүллэр. Онно биһиги өрөспүүбүлүкэбититтэн Александр Артемьев кыттыаҕа.
Василий НИКИФОРОВ,edersaas.ru
Хаартыскаҕа: Александр Артемьев дойду АККОР-ун бэрэсидьиэнэ Владимир Плотниковка Саха сиригэр бааһынай хамсааһына хайдах сайдыбытын кэпсиир кинигэни бэлэхтиир түгэнэ.