Бу күннэргэ «Саха атынан — Лондоҥҥа» бырайыак кыттааччылара англичанин Никита Греци уонна саха ыччата Дугуйдан Винокуров Лондоҥҥа турунуохтаах этилэрэ.
Ол эрээри сыстыганнаах дьаҥынан сибээстээн, Лондоҥҥа кыраныысса барыта сабыллан турар буолан, Никита Греци кыайан кэлбэтэ. Дойдутугар «британскай коронавирус» туран, ыыппатылар. Онон Дугуйдан Винокуров туроруммут соругун бэйэтэ тиһэҕэр тиэрдэр буолла. Хорсун санаалаах саха ыччата санаатын бу курдук үллэстэр:
— «Саха» НКИХ суруналыыстара Саха сириттэн Лондоҥҥа тиийиэхтээх айанньыттар тустарынан бэртээхэй документальнай киинэлэрэ өрөспүүбүлүкэ олохтоохторун үгүстэрин сэҥээрдибитэ.
Онон итиччэ улахан «тыаһы» таһааран баран, тохтоон хаалбат буоллахпыт. Миигин кытта Никита Греци оннугар бииргэ төрөөбүт эдьиийим кэргэнэ Мичил Неустроев барсар буолла. Онон санаабытын түһэрбэппит. Күтүөппүн кытта бииргэ айанныахпыт. Никита Греци «тохтоон, миигин кэтэһэ түс» диир да, бу дьаҥ төһө өр барара биллибэт. Онон сирбитин ыла турарбыт ордук диэн санааҕа кэллибит.
Дугуйдаан Винокуров аҕатынаан, Өймөкөөн улууһун аатырбыт сылгыһыта Семён Винокуровы кытта Англия уола Никита Грецини саха атын айааһыырга, аһатарга, көрөргө-истэргэ үөрэппиттэрэ.
Бу айан научнай соруга суох. Икки омук айанньыта 15 тыһ. км түөрт саха атынан айаннаан тиийэллэрин көрдөрүөхтээх, иһитиннэриэхтээх этилэрэ. Кырдьык, «Саха» НКИХ биэриитэ Саха сирин олохтоохторун олуһун интэриэһиргэппитэ. Ордук сылгыһыттар сэргээн батсаапка «Саха атынан Лондоҥҥа» диэн бөлөҕү, онтон Дугуйдан бэйэтэ инстаграмҥа yakutia_england диэн анал сирэйи арыйдылар.
Айанньыт уолаттар тус эмбилиэмэлээхтэр. Дугуйдан кэпсииринэн, астарын-үөллэрин бэйэлэрин үптэринэн атыыластылар.
— Харчынан көмөлөһөр баҕалаах дьон үгүс этэ да, бэйэбит баҕабытынан баран эрэр дьон буолан, ороскуоппутун сүрүннээн бэйэбит уйуннубут. «Охотный двор» диэн маҕаһыын салалтатыгар барҕа махталбытын тиэрдэбит. Кинилэр таҥаспытын бэрийдилэр.
Дьокуускайга дылы «Сахафильм» оператора, табаарыһым Михаил Кардашевскай киинэҕэ устан, айаммытын сырдатыаҕа. Онтон сыыйа көстөн иһиэ. Батсаап бөлөхпүтүгэр «Лондоҥҥа тиийэ бара сатаамаҥ, аара тюрк аймахтарбытыгар казахтарга дуу, бүрээттэргэ дуу, монголларга дуу тиийээт, төннүҥ» диэн сүбэлииллэр да, Лондоҥҥа диэн быһаарбыппыт да, ол санаабытын булгуруппатыбыт, — диэн кэпсиир Дугуйдан Винокуров.
Бүгүн уолаттар дойдуларыгар Өймөкөөҥҥө айаннаатылар. Кулун тутар 1 күнүгэр кинилэри Үчүгэйтэн биир дойдулаахтара үөрүүлээх быһыыга-майгыга ыраах айаҥҥа — Лондоҥҥа атаарыахтара. Ыччаттарбыт саха атынан айаннарын сиһилии сырдата олоруохпут.
Елена ПОТОЦКАЯ, «Cаха сирэ» хаһыат, edersaas.ru