Саха атынан айанныыр Өймөкөөн сылгыһыттарын ньурбалар айхаллаан атаардылар
Тымныы Полюһуттан Өймөкөөнтөн быйыл саас муус устартан саха атынан аттаммыт сылгыһыттар Дугуйдан Винокуров уонна Мичил Неустроев бэйэлэрин ыраах айаннарын Саха сирэ 100 сыллаах үбүлүөйүгэр аныыллар.
Эдэр дьон Үөһээ Бүлүү Намыгар аттарыгар, бэйэлэригэр быһыы ылан, тустаах докумуоннарын оҥотторон, тохтуу сырыттылар.
От ыйын 27 күнүттэн Ньурба улууһун Үөдэйинэн, Маарынан, Дьаарханынан, Чаппанданан айаннаан, Антоновкаҕа тиийдилэр.
Манна сылгыһыттары түмэлгэ сырытыннардылар, улуустарын туһунан ирэ-хоро кэпсээтилэр.
Уолаттар мусуой эспэнээттэрин, истиэндэлэрин бэркэ сэргээн көрдүлэр, үөрэттилэр.
Мэгэдьэк сылгытын боруодатын иитэр буолан, ньурбалар саха сылгытын аатын-суолун сураҕырда баран иһэр Тымныы полюһа Өймөкөөн ыччаттарын, төһө да уустук балаһыанньаҕа олордоллор, саха сиэринэн бэрт иһирэхтик көрүстүлэр.
«Сахабыт сирин дьоно-сэргэтэ биһигини тиийбит сирбитигэр уруйдуу-айхаллыы көрсөн, сылаас үүттээх чэйинэн, минньигэс алаадьынан, сылаас аһынан күндүлээн көрсөллөр.
Хас биирдии нэһилиэккэ сырыттахпыт аайы алгыс тылын этэн атаараллара — санаабытын кынаттыыр. Махтал буоллун бар дьоммутугар!», — диэн Дугуйдаан Винокуров ньурбаларга истиҥ махталын тиэртэ.
Бу күннэргэ атырдьах ыйын саҥатыгар Өймөкөөн сылгыһыттарын айана Сунтаар улууһунан ааһыаҕа.
Елена ПОТОЦКАЯ, “Саха сирэ” хаһыат, edersaas.ru
Хаартыска — Өймөкөөн улууһун «Мин дойдум» бассаап бөлөхтөн.