Атырдьах ыйын 2 күнүгэр саха атын тургутар айанньыттары, хоту дойду тымныы полюһун Өймөкөөн хоһуун ыччаттарын, Сунтаар улууһун Сиэйэ олохтоохторо түүннэри кэтэһэн көрүстүлэр.
Сиэйэлэр Дугуйдан Винокуровка уонна Мичил Неустроевка айаннарыгар олус туһалаах бэртээхэй бэлэҕи утары ууннулар:
— «Эһиги үтүө холобургутун биһиги ыччаттарбыт батыһыахтара» диэн туран, сэмэй бэлэхпитин уунабыт. Бу бастыҥа буолбатах.
Эһигини айаҥҥытыгар арчылыыр түүн хараҥаҕа сырдаан көстөр бэлиэ, — диэн баран, бэлэхтэрин төбөлөрүгэр баайдылар.
Кырдьык, уолаттар абыраныыһылар. Уһун айаҥҥа хараҥаран хааллахтарына, массыыналар кинилэри ыраахтан көрөн, муҥ кыраайдарынан көтүтэн ааһыахтара суоҕа, сэрэниэхтэрэ.
Дугуйдан Винокуров Сиэйэ олохтоохторугар, төһө да түүн буоллар анаан кэтэһэн көрсүбүттэригэр барҕа махталын тиэртэ уонна саха атын тургутан көрүү САССР 100 сылыгар ананарын бэлиэтээтэ.
Сиэйэлэр айанньыттары кытта өйдүү-саныы сылдьарга хаартыскаҕа түстүлэр.
Оттон күнүс Кутанаҕа уолаттары байааннаах ырыанан, арыылаах алаадьынан көрүстүлэр.
«Дьэ, ыалдьытымсах дьон эбит, ытык Сунтаар олохтоохторо! Уолаттарбытын маанылаан көрсөллөр. Махтал бастыҥа кинилэргэ!» — диэн Өймөкөөн улууһун батсаап бөлөхтөрүгэр уонна 118 киһилээх Дугуйдан Винокуровы уонна Мичил Неустроевы өйүүр «Саха атынан Лондоҥҥа» батсаап бөлөххө махтаналлар.
Уолаттарбыт ыраах айаннара Сунтаар улууһун устун салҕанар.
Елена ПОТОЦКАЯ, «Саха сирэ» хаһыат, edersaas.ru
Хаартыска: «Саха атынан Лондоҥҥа» батсаап бөлөхтөн.