Саха атыгар министиэристибэ туруорбут Бөлөрүүһүн Нам II Хомустааҕын ыала ылла
Нам улууһугар Сылгыһыт күнүнэн ыытыллыбыт өрөспүүбүлүкэтээҕи тэрээһин биир кэтэһиилээх, кэрэхсэбиллээх түгэнэ – Таастаахтан Бартыһааҥҥа диэри саха аттарын 6 көскө сүүрдүү олохтоохтор өрөгөйдөрүнэн түмүктэннэ. Өрүс уҥуор сытар II Хомустаах нэһилиэгин олохтооҕо Федор Габышев 7 саастаах Буурҕа диэн ата бастакынан кэлэн, күрэхтэһии саамай сүрүн бирииһин, Бөлөрүүс тыраахтары, тэбэн биэрдэ.
edersaas.ru
Сүүрдүү буолуо биир күн иннинэ сарсыарда сылгы учуонайдара, экспертэр кыттыахтаах аттары сыныйан көрөн бараннар, 50 аттан ирдэбилгэ 33 эрэ сөп түбэһэрин, атыттар күрэхтэһииттэн туоратыллыбыттарын биллэрбиттэрэ. Холобур, Хаҥалас Улахан Ааныттан “Бөртө” сылгы собуота аҕалбыт аттарыттан аҥаара сыыйыллыбыта. Аммалар аттара эмиэ сиэнчэр буолан, аймана сылдьаллара. Ити гынан баран, “дьон бачча ыраах ороскуот бөҕөнү көрсөн тиэйэн аҕалбыттарын аахсан, кытыннарыахха” диэн этиини тэрийээччилэр уонна дьүүллүүр хамыыһыйа ылынаннар, сиэнчэрдэри туспа бириискэ сүүрдэргэ быһаарбыттара. Онон, Таастаахтан сарсыарда 11 чаас саҕана 50 ат түспүтүттэн биэтэккэ 25 ат, сорохтор сыккырыыр тыыннара эрэ, кэллэ.
Бастыҥ аттар 6 көһү 3-3,5 чааһынан кэлиэхтэрэ диэн сабаҕалаабыттара – биир чаастан эрэ ордук кэм ааспытын кэннэ бастакылар сирдэрин ортотун ааспыттара иһилиннэ. Онтон чочумча буолаат, Бартыһаан нэһилиэгин Үчүгэй Алааска баар ипподромун уҥуор аттаах киһи иһэрэ көһүннэ. Биэтэккэ бастакынан сиэнчэр хааннаах ат өрө ууннаран кэллэ. Бу – Амма ата Адырыын, көрдөрүүтэ: 2 чаас 31 мүн. 40 сөк. Киниттэн бэрт кыранан (2 чаас 33 мүн.) хаалан, эмиэ Амма “Давидов” хаһаайыстыбатын ата Хоройор түмүктээтэ. Дьэ, онтон икки аттаах киһи сыарҕа сыҥааҕыныы тэбис-тэҥҥэ бөтөрөҥнөтөн кэллилэр. Нам ата Буурҕа сиэнчэр Сарыалы (Амма, “Давидов”) биэтэккэ тахсыыга 1 сөкүүндэнэн сиирэ-халты урутаан, саха аттарыгар кыайыылааҕынан ааттанна (кинилэр көрдөрүүлэрэ: 2 чаас 37 мүн. 02 сөк. уонна 2 чаас 37 мүн. 03 сөк.).
Инньэ гынан, Сарыал сиэнчэр аттарга үһүс миэстэлэннэ. Саха аттарыгар иккиһи Мэҥэ Хаҥаластан Күрүлгэн 2 чаас 42 мүн. 10 сөк., үсүһү Тааттаттан Дьаҕылтай 2 чаас 42 мүн. 18 сөк. кэлэннэр ыллылар. Кэлиҥҥилэр бириискэ тиксибэт буолбуттарын билэннэр, аттарын харыстаан, хаамтаран кэлбит буолуохтаахтар. Мэҥэ Хаҥалас Байкалов аатынан хаһаайыстыбатын кырдьаҕас сылгыһыта, СӨ Судаарыстыбаннай бириэмийэтин лауреата Георгий Романов Бартыһааҥҥа ыытыллыбыт мунньахха тэрийээччилэргэ туһаайан: “Саха атын итиччэ ыраахха быһымахтык сүүрдэн, бырдын быһаҕыт. Ити оннугар сир ортотугар диэри ыҥыырга миинэн баран, сыарҕалаан, таһаҕастаан айаннатар сылгыһыт атын тургутарга ордук барсыан сөп этэ”, — диэбитин сылгыһыттар сэҥээрбиттэрэ.
Саха аттаахтарга бастаабыт II Хомустаах олохтооҕо Федор Габышев өрүс уҥуор “Беларус 320,4” мааркалаах тыраахтарынан (Тыа хаһаайыстыбатын уонна ас-үөл бэлиитикэтин министиэристибэтин бирииһэ, 780 тыһ. солк. сыаналаах) сүүрдэн барда. Федор Федорович күрэхтэһиигэ эрдэттэн бэлэмнэнэн, атын алтынньыттан ыла баайбыт. Кини коммунальнай хаһаайыстыбаҕа үлэлиир эбит, кэтэх хаһаайыстыбатыгар сылгылардаах. Иккис миэстэлээх мэҥэ хаҥаластарга Нам улууһун дьаһалтатын бирииһин — “Синтай” тыраахтары туттардылар. Үһүс буолбут таатталар бэйэлэрин улуустара туруорбут “Буран” көлөнү илдьэ бардылар.
Үөһээ хаартыскаҕа: Федор Габышев ат сүүрдээччитэ Юрий Семеновтыын.
Василий НИКИФОРОВ, edersaas.ru