Бу күннэргэ саха аттарынан Лондоҥҥа айаннаан эрэр Тымныы полюһа Өймөкөөн ыччаттара Дугуйдан Винокуров уонна Мичил Неустроев Томпо улууһун аастылар.
Улуустааҕы «Томпо илдьитэ» хаһыат суруналыыһа Евдокия Неустроева иһитиннэрбитинэн, айанньыттары улуус киинигэр баһылыгы бастакы солбуйааччы Руслан Атаков салайааччылаах улуус уопсастыбаннаһа көрсүбүттэр. Уолаттар суолга биэстэ аһаҕас халлааҥҥа балааккаҕа хоммуттар. Томпоҕо улуус бэтэринээрдэрэ аттар туруктарын көрдүлэр-иһиттиллэр уонна айан этэҥҥэ баран иһэрин бэлиэтээтилэр.
Аара кинилэр айаннаан иһэн соһуччу Ил Түмэн дьокутааттарын көрсүбүттэр.
Теплай Ключка Нуучча географическай уопсастыбатын өрөспүүбүлүкэтээҕи салаатын чилиэнин Егор Борисовы кытта көрсөн кэпсэппиттэр.
Бу күннэргэ социальнай ситимнэргэ ыраах айаҥҥа баран иһэр уолаттар тустарынан араас кэпсэл тарҕанна. Ол курдук, «бу айантан сылтаан норуоттар икки ардыларынааҕы айдаан тахсыах курдук» диэн саҥа-иҥэ, «саха ыччаттара Никита Греци бырайыагын бэйэлэригэр иҥэрдилэр» диэн, плагиакка да балылыннылар. Бу суолталаах айаны сырдата олорор «Саха атынан Лондоҥҥа» айан пресс-сэкирэтээрэ Ньургун Габышев бүгүн айанньыттары өйүүр батсаап бөлөҕөр «саха атын өйүүр Егор Макаровы кытта уолаттар көрсөн кэпсэттилэр, сүбэлэстилэр. Кулун тутар 22 күнүгэр Дугуйдан Винокуров уонна Мичил Неустроев Чурапчы улууһугар ыытыллыахтаах Сылгыһыт күнүгэр тиийэн тэрээһиннэргэ кыттыахтара, суруналыыстары кытта көрсүөхтэрэ, өрөспүүбүлүкэ сылгыһыттарын кытта айан туһунан сүбэлэһиэхтэрэ. Онно санааларын атастаһан баран, салгыы туох быһаарыы ылыммыттарын сырдатыахпыт. Бүгүҥҥү күҥҥэ араас санаа баар. Ол иһигэр ыччаттар айаннаан эрэр маршруттарын уларытан баран, Лондоҥҥа буолбакка, саха сылгыта Аҕа дойду сэриитигэр айаннаабыт маршруттарын туһаайыытын тутуһуу эмиэ баар», диэн иһитиннэрии оҥордо.
Бүгүн уолаттар Томпо улууһун Кэскил нэһилиэгиттэн Таатта улууһун туһаайыытын тутустулар.
Елена ПОТОЦКАЯ,»Саха сирэ» хаһыат, edersaas.ru
Хаартыска: «Томпо илдьитэ» хаһыат саайтыттан уонна «Саха атынан Лондоҥҥа» батсаап бөлөҕүттэн.