Сүрүн Уопсастыба

Саха аттара Өймөкөөн улууһун кыраныыссатын аастылар!

Бу күннэргэ Өймөкөөн улууһун Үчүгэй нэһилиэгин Дьэкэй учаастагыттан Дугуйдан Винокуров уонна Мичил Неустроев Лондоҥҥа айаннарын саҕалаатылар.

Уолларын уонна күтүөттэрин ийэлээх аҕа Семен уонна Ирина Винокуровтар трасса суолугар диэри атааран баран, алгыы хаалбыттара.

Уолаттар бу сарсыарда «Восточнай» күнү-дьылы кэтиир ыстаансыйа аттыгар сынньана түһэн баран, салгыы айаннаабыттара.  Оттон бүгүн күнүс Өймөкөөн кыраныыссатын аастылар!

Бу туһунан «Саха атынан Лондоҥҥа» айан пресс-сэкирэтээрэ Ньургун Габышев иһитиннэрдэ. Кини инстаграмҥа yakutia_england уонна батсаапка «Саха атынан Лондоҥҥа» бөлөххө айан туһунан билиһиннэрэн иһэр.

Маны таһынан, «Саха сирэ» хаһыат edersaas.ru саайта Ньургун Габышевы кытта ыкса сибээстээхтик үлэлиир буолан, айан туһунан сөптөөх иһитиннэриини биэриэҕэ.

Тоҕо инньэ диир эбит буоллахха, дириҥ суолталаах айаны күлүүгэ-элэккэ кубулутааччы дьон суох буолбатахтар, биирдиилээн да буоллаллар, бааллар. Ол курдук, уолаттар аттара куоппутун туһунан олоҕо суох иһитиннэрииттэн бу айаҥҥа суолта биэрэр дьон кэлэйбиттэрэ. Сотору-сотору социальнай ситимнэргэ атынан айаннаан эрэр уолаттарга сыһыаннаах суоппардары сэрэтэр араас биллэриилэр тахсаллар. Ол ону, биллэн турар, ким суруйара биллибэт, аата-суола суох тахсар.  Онон чуолкай иһитиннэрии үөһэ ааттаммыт социальнай ситимнэргэ уонна edersaas.ru саайтка тахсыаҕа.

Уолаттарбыт саха киһитин сиэринэн, холкутук, ыксаабакка «Халыма» федеральнай айан суолун устун айаннаан иһэллэр.

Аара трасса ааһар улуустарын нэһилиэнньэлээх пууннарыгар тохтоон ааһыахтара. Биллэн турар, Томпо, Таатта, Мэҥэ Хаҥалас улуустарын олохтоохторо, сылгыһыттара аара Дугуйдан Винокуровы уонна Мичил Неустроевы утары көрсөн өйүөхтэрэ, туох кыалларынан көмөлөһүөхтэрэ.

Елена ПОТОЦКАЯ, “Саха сирэ” хаһыат, edersaas.ru

Видео уонна хаартыска — yakutia_england инстаграмтан.

2
0
Telegram @edersaas20

Добавить комментарий