Бу күннэргэ Казань куоракка (Татарстан) түмүктэммит чэпчэки атлетикаҕа дойду чөмпүйэнээтигэр Саха сирин атлеттара үрүҥ көмүс уонна боруонса мэтээллэри ылары ситистилэр.
Ол курдук, дьаадараны быраҕыыга Максим Афонин, көһүтүллүбүтүн курдук, иккис миэстэҕэ таҕыста. Арассыыйа үтүөлээх тириэньэрэ Николай Колодко иитиллээччитэ дьаадараны 20 м 44 см ыраахха кыыратта. Бу көрүҥҥэ бастаабыт Александр Лесной үһүс төгүлүн Арассыыйа чөмпүйүөнүнэн буолла итиэннэ бэйэтин тус рекордун олохтоото — 21 м 58 см. Манна даҕатан эттэххэ, быйылгы сезоҥҥа бу дойдуга бастыҥ көрдөрүү. Константин Лядусов (20 м 04 см) боруонса призерунан буолла.
Оттон Сунтаар быһый кыыһа Наталья Леонтьева 3 000 м мэһэйдээх сүүрүүгэ биэтэккэ үсүһүнэн кэллэ. Бириэмэтэ — 9.50.19. Манна бастаабыт Екатерина Ивонина дистанцияны 9 мүнүүтэ 16.68 сөкүүндэнэн түмүктээтэ. Бу быйылгы сезоҥҥа Европаҕа бастыҥ көрдөрүү.
Былырыыҥҥыттан саҥа “стипль-чезка” идэтийэн эрэр Наталья бириэмэтин эмиэ лаппа тупсарда. Ол курдук, бу ый саҥатыгар буолбут ини-бии Знаменскайдар мемориалларыгар кини дистанцияны 10.02.80 түмүктээн турар. Санатар эбит буоллахха, Наталья былырыын дойду чөмпүйэнээтигэр “стипль-чезка” төрдүс буолбута.
Дойду чөмпүйэнээтин түмүгүнэн атырдьах ыйын 6 -12 күннэригэр Берлиҥҥэ (Германия) ыытыллар чэпчэки атлетикаҕа Европа чөмпүйэнээтигэр кыттар хамаанда сүүмэрдэниэҕэ. Арассыыйа атлеттара онно кытталларын-кыттыбаттарын ИААФ бэйэтин от ыйын 27 күнүнээҕи мунньаҕар быһаарыаҕа.
Роман Попов, edersaas.ru
Хаартыскалар Интэриниэттэн ылылыннылар.