Сарсыҥҥыттан Казань куорат Киин стадионугар чэпчэки атлетикаҕа Арассыыйа чөмпүйэнээтэ саҕаланар. РФ чэпчэки атлетикаҕа федерациятын, РФ Спорка министиэристибэтин, Татарстан Өрөспүүбүлүкэтин Спорка министиэристибэтин тэрийиилэринэн ыытыллар күрэхтэһиигэ 76 регионтан тыһыынча кэриҥэ спортсмен кыттара күүтүллэр.
Манна дойду чулууларын кытта Саха сирин атлеттара эмиэ күүстэрин холоһуохтара. Ол курдук, стипль-чезка ( 3 000 м мэһэйдээх сүүрүүгэ) Наталья Леонтьева күрэстэһиэҕэ. Баҕардар, кини 5 000 м эмиэ сүүрүөҕэ.
Дьаадараны быраҕыыга Максим Афонин мэтээл иһин киирсиэҕэ диэн буолар. Арассыыйа үтүөлээх тириэньэрэ Николай Колодко иитиллээччитин сүрүн утарылаһааччытынан сезон лидерэ Александр Лесной буолара сабаҕаланар.
Саха Өрөспүүбүлүкэтин үтүөлээх тириэньэрэ Петр Нечаев иитиллээччитэ Игорь Чудинов 110 м мэһэйдээх сүүрүүгэ стартыаҕа.
Санатар буоллахха, Арассыыйа чөмпүйэнээтэ от ыйын 19 – 22 күннэригэр ыытыллар. Чэпчэки атлетиканы сөбүлээччилэр ВФЛА сайтыгар киирэн быһа биэриилэри көрүөхтэрин сөп.
Роман Попов, “Саха сирэ” хаһыат
Хаартыскалар Интернеттэн ылылыннылар.