Култуура бары салааларын тэрилтэлэрэ, айар кэлэктииптэрэ ыйы быһа бэлэмнэнэн Саха АССР 100 сылыгар анаан туруоруллубут «И они продолжили творенье мира» («Эллэй эһэбит саҕаттан…») поэма-мистерия «Триумф» спортивнай комплекска толору көрөөччүнү муста.
Бу дириҥ ис хоһоонноох уһулуччулаах тэрээһини режиссер Андрей Борисов салайар режиссерскай бөлөҕө үрдүк таһымҥа бэлэмнээн ыытта. Кылаабынай режиссер Руслан Тараховскай, кини ассистеннара Гаврил Менкяров, Роман Дорофеев, Андрей Габышев өйтөн-санааттан умнуллубат бырааһынньыгы бэлэхтээтилэр.
Ил Дархан Айсен Николаев Саха АССР саҥа тэриллиэҕиттэн күн бүгүҥҥэ диэри устуоруйатын ырытта. Кини эдэр автономнай өрөспүүбүлүкэ тэриллээт да, социальнай, гуманитарнай хайысхаларынан сайдан барбытын, 30-с сыллартан бырамыысыланнас сайдыыта саҕаламмытын, Аҕа дойду сэриитин сылларыгар АЛСИБ байыаннай аэродромнара Улуу Кыайыыга кылааттарын киллэрбиттэрин, сэрии кэнниттэн көмүс, алмаас хостооһуна саҕаламмытын, БАМы тутааччылар бүгүҥҥү ситиһиигэ кылааттарын киллэрбиттэрин бэлиэтээтэ.
Бары улуустартан бочуоттаах дьоннорун илдьэ улуустар дэлэгээссийэлэрэ кэлбиттэр. Усуйаана улууһун түмсүүтүн 20-тэн тахса сыл салайар Ирина Абрамова санаатын үөрэ үллэһиннэ:
— Киин куоракка олорор усуйааналар 15 киһилээх дэлэгээсcийэ буолан “Триумфка” ыҥырыллан кэллибит. 100 сыл – Саха сирэ олохтонуоҕуттан бүгүҥҥүтүгэр диэри олус улахан суолталаах тэрээһини көрөн, олус астынныбыт. Наһаа да элбэх киһи мустубут. Дьон санаата көтөҕүллүбүт.
Саха сирэ Арассыыйа судаарыстыбатыгар киирбитэ 390, Саха АССР төрүттэммитэ 100 сылыгар анаммыт тэрээһиҥҥэ дойдубут устуоруйата киинэ лиэнтэтин курдук көстөн ааспыта барыбытын долгутта.
Елена ПОТОЦКАЯ, «Саха сирэ» хаһыат.
Хаартыскалар: СИА уонна ааптар түһэриитэ.