“Аан дойду виртуоз-хомусчута” норуоттар икки ардыларынааҕы III куонкурус иитинэн, бэс ыйын 16 күнүгэр Дьокуускай куорат Орджоникидзе болуоссатыгар хомуска тардыыга флеш-моб буолуоҕа. Далааһыннаах тэрээһиҥҥэ ким баҕалаах бары кыттыан сөп. Бары бииргэ биир матыыбы таһаарыахтара.
“Сахаларга түмсүү бэлиэтинэн оһуохай буолар. Ол бэлиэтигэр өрөспүүбүлүкэ хас биирдии улууһа, куората биһиги флеш-мобпутугар кыттыаҕа. Онно бары хомуһунан оһуохайы таһаарыахтаахпыт. Улуустар видеоларын номнуо ыытан эрэллэр. Буолар күнүгэр ол видеолары көрдөрүөхпүт, оттон флеш-моб оффлайн кыттааччылара Саха автономиятын 100 сылын бэлиэтинэн 100 сыыппара курдук туруохпут. Быһа холуйан 300 киһи кыттыа диэн суоттанабыт. Сахалыы таҥастаах буолуохпут, баҕалаахтары барыларын ыҥырабыт”, — диэн Хомус аан дойдутааҕы норуоттарын түмэлин уонна киинин экспозицияҕа салаатын сэбиэдиссэйэ Туйаара Жиркова ыҥырар.
Улуустартан бастакынан хомуска тардыыны 175 киһи кыттыылаах Таатта улууһа ыытта. Оһуохайы таһаарааччылар – импровизатор-хомусчут Л.Н. Турнин аатынан “Татыйык” култуура дьиэтин хомусчуттарын ансаамбылын солистара.
Орджоникидзе болуоссатыгар ыытыллар оффлайн флеш-мобка кыттарга https://forms.gle/wHBLVcJwTgfrA4kw8 ыйыллыбыт сигэнэн анкетаны толорор ирдэнэр.
Ыспыраапка: “Аан дойду виртуоз-хомусчута” норуоттар икки ардыларынааҕы хомуска тардааччылар (варган) куонкурустара дириҥ устуоруйалаах. Бу иннинэ 1991 уонна 2011 сыллардаахха Хомус (варган) норуоттар икки ардыларынааҕы бэстибээл-кэнгириэһин кэмигэр Дьокуускайга икки төгүллээн буолбута. Бу хомуска (варган) толорооччулар ортолоругар “Аан дойду виртуоз хомусчута” диэн саамай үрдүк аат иҥэриллэр соҕотох куонкуруһа.
Бу иннинээҕи икки куонкурус түмүгүнэн “Аан дойду виртуоз хомусчута” үрдүк ааты Арассыыйаттан (Саха сирэ, Тыва, Башкортостан), тас дойдуттан (Кыргызстан, Япония, Франция, Норвегия, Австрия, АХШ) 18 хомусчута ылбыта.
1991 сыллаахха сахалартан Петр Оготоев, Сиридон Шишигин уонна Федора Гоголева виртуоз-хомусчут аатын сүкпүттэрэ. 2011 сыллаахха — Альбина Дегтярева, Юлияна Кривошапкина-Дьүрүйээнэ уонна Ким Борисов.
Норуоттар икки ардыларынааҕы үһүс куонкурус быйыл бэс ыйын 16-17 күннэригэр ыытыллыаҕа. Тэрээһин РФ бэрэсидьиэнин гранын өйөбүлүнэн олоххо киирэр. Тэрийээччилэр: СӨ Бырабыыталыстыбата, СӨ Култууратын уонна духуобунай сайдыытын министиэристибэтэ, Хомус аан дойдутааҕы түмэлэ уонна киинэ (Дьокуускай к.), Варган норуоттар икки ардыларынааҕы уопсастыбата.
Хомус аан дойдутааҕы норуоттарын түмэлин уонна киинин пресс-сулууспата.