Бүгүн, кулун тутар 22 күнүгэр, «Сахамедиа» медиа-киинигэр Саха АССР 100 сылынан бу сыл устата ханнык тэрээһиннэр ыытыллалларын билиһиннэрдилэр. Манна Бырабыыталыстыба бэрэссэдээтэлин солбуйааччы Сергей Местников, СӨ култуураҕа миниистирэ Юрий Куприянов, норуоттар дьыалаларын уонна тас сибээс миниистирэ Гаврил Кириллин, «Конгресс-Центр Якутия» салайааччыта Максим Сыромятников иилээн-саҕалаан ыыттылар.
«Сахамедиа» улахан экрааныгар үбүлүөйдээх сылга ханнык тэрээһиннэр ыытыллыахтарын туһунан анал презентациялары көрдөрдүлэр. Тэрээһиҥҥэ суруналыыстар, блогердар сырыттылар. Ол курдук, Саха АССР төрүттэммитэ 100 сылыгар анаммыт үрүҥ көмүс манньыаты, баан каарталарын улахан экран нөҥүө көрдөрөн билиһиннэрдилэр.
100 cылга бастакы төрөөбүт оҕоҕо үрүҥ көмүс оонньуур-погремушканы туттарыы видеотын көрдөрдүлэр. Маннык бэлэҕи 1000 төрөөбүт оҕоҕо уонна Судаарыстыбаннас күнүгэр муус устар 27-гэр төрөөбүт оҕолорго туттарыахтара. Маны сэргэ өрөспүүбүлүкэбитигэр бу сылга ыытыллыахтаах улахан култуурунай тэрээһиннэри култуура миниистирэ Юрий Куприянов билиһиннэрдэ. Кини үбүлүөйдээх сылы көрсө кулун тутар ый ортотуттан аан дойду, Арассыыйа таһымнаах быыстапкалар, Саха сирин аныгы устуоруйата, Саха АССР төрүттэниититтэн саҕалаан документальнай киинэлэр, испэктээктэр, кинигэлэр сүрэхтэниилэрэ буолалларын эттэ. Третьяковскай галерея ыалдьыттааһына, аныгы искусство бэстибээлэ – быһата култуура эйгэтигэр олус үгүс сэргэх тэрээһин ыытыллара күүтүллэр.
Маны сэргэ, 100 сыллаах үбүлүөйүнэн сахалыы бородууксуйалары оҥорон таһаарар тэрилтэлэр бэйэлэрин сэмэй кылааттарын киллэрэн, Cаха АССР 100 сыла диэн бородууксуйаларыгар суруйар буолбуттар. Ол курдук, «Сахачай», «Камелек» бородууксуйаларыгар көрүөххэ сөп.
100YAKUTIA.RU диэн үбүлүөйдээх сылы көрсө саҥа саайт арыллан үлэтин саҕалаабытын туһунан бүгүҥҥү тэрээһиҥҥэ эмиэ иһитиннэрдилэр.
Ульяна ЗАХАРОВА.