Саха АССР 100 сылыгар социальнай суолталаах 85 эбийиэк тутулунна. 2022 сыл устатыгар өссө 23 эбийиэк былааннанар.
Тохсунньуга Уус Алдан улууһугар Оҕуруоттаахха 220 оҕо үөрэнэр оскуолата, Өлүөхүмэҕэ 240 кырачаан сылдьар уһуйаана аһыллыбыттара.
«САССР 100 сыла биһиэхэ куораттары уонна сэлиэнньэлэри тупсарыыга, экологияҕа, үөрэххэ, доруобуйа харыстабылыгар, култуураҕа үрдүк тосхоллордоох сайдыы саҥа түһүмэҕин саҕаланыытынан буолуохтаах«, — диэн бэлиэтиир СӨ Ил Дархана Айсен Николаев.
Үбүлүөйдээх сылга өрөспүүбүлүкэҕэ сүрэх-тымыр киинэ (кардиососудистай) үлэтин саҕалыа. Наука аччыгый академиятын саҥа үөрэтэр куорпуһа аһыллыа. Дьокуускайга 68-с түөлбэҕэ 990 оҕо үөрэнэр оскуолата тутуллан үлэҕэ киириэ. Чурапчы улууһугар 90/40 миэстэлээх оскуола-уһуйаан, Ньурбаҕа 350 оҕо үөрэнэр оскуолата, Эдьигээҥҥэ Кыстатыам сэлиэнньэтигэр 60/30 миэстэлээх оскуола-уһуйаан, Эдьигээҥҥэ 240 миэстэлээх «Эйгэ» этнокултуурунай киин тутуллуохтара.
Сыл биир улахан суолталаах бэлиэ тэрээһинигэр — Уус Алдаҥҥа Саха сирин норуоттарын VIII спортивнай оонньууларын көрсө 1000 миэстэлээх стадион, успуордунан дэгиттэр дьарыктанарга комплекс, элбэх хайысхалаах доруобуйаны чэбдигирдэр спортивнай комплекс дьэндэйиэхтэрэ. Бүлүүгэ 73 куойкалаах балыыһа комплекса, Дьокуускайга, Алдаҥҥа, Чульмаҥҥа хаҥкылыыр сирдээх физкультуралыыр, доруобуйаны чэбдигирдэр комплекстары тутуу үлэтэ салҕанар.
Санатан эттэххэ, САССР 100 сылыгар эбийиэктэри тутуу 2015 сылтан саҕаламмыта.
+1
+1
+1
+1
+1
+1
+1