“Хотугу сулус” оҕолор сынньалаҥнарын тэрийэр уонна доруобуйаларын чэбдигирдэр киин ситэн-хотон 2022 сыл бүтүүтүгэр үлэҕэ киириэхтээх. Бу өрөспүүбүлүкэҕэ эбии үөрэхтээһин тутаах эбийиэгинэн буолуохтаах.
СӨ Ил Дархана Айсен Николаев уонна “Открытие” баан бырабылыанньатын бэрэссэдээтэлэ Михаил Задорнов бэҕэһээ, сэтинньи 12 күнүгэр, Кырдьаҕас Табаҕаҕа тутуу былаһааккатыгар сырыттылар.
Ил Дархан доруобуйа харыстабылыгар, олох хаачыстыбатын тупсарыыга эрэ буолбакка, сүдү суолталаах былааннарга, кэнчээри ыччакка туһуланар үлэҕэ улахан болҕомто уурулларын бэлиэтээтэ.
“Киин үлэҕэ киирдэҕинэ, оҕолор эргиччи сайдалларыгар, туһалаахтык сынньаналларыгар, чэбдигирэллэригэр туох баар усулуобуйа барыта тэриллиэ. Кэлэр өртүгэр киин баазатыгар оҕо сынньалаҥын Уһук Илиннээҕи оператора тэриллиэҕэ”, — диэтэ Ил Дархан.
Эбийиэк тутуллуутугар “Открытие” баан быһаччы кыттыыны ылыаҕа. Бары өрүтү үөрэтэн баран, мунньахха СӨ Ил Дархана Айсен Николаев бырабылыанньа бэрэссэдээтэлэ Михаил Задорновы кытары «Хотугу сулус» киини 2022 сыл бүтүүтүгэр үлэҕэ киллэрэргэ кэпсэттилэр.
“Өрөспүүбүлүкэ сиригэр-уотугар ыытыллар бөдөҥ инфраструктурнай бырайыактарга кыттыһарга бэлэммит. Баан “Хотугу сулус” сылы эргиччи үлэлиир оҕо аныгы киинин кыттыгас үбүлүүргэ бэлэм. Үп-харчы Уһук Илини сайыннарыы Пуондатын гранынан өйөбүлүн өртүттэн, эрэгийиэн бүддьүөтүттэн уонна “Открытие” баантан киириэҕэ. Дьоһун суолталаах эбийиэк 2022 сыл бүтүүтүгэр тутуллан бүтэригэр эрэнэбин”, — диэтэ Михаил Задорнов.
Билиҥҥи туругунан эбийиэк 30% бэлэм. Бу Саха сиригэр эбии үөрэхтээһин тиһигэр бөдөҥ тутуунан буолуоҕа. Оҕолору сайыннарарга, үөрэтэргэ, чэбдигирдэргэ аныгы үйэ ирдэбилигэр эппиэттиир усулуобуйа тэриллиэҕэ, уопсай уонна эбии үөрэхтээһин, доруобуйа харыстабылын, физкултуура уонна успуорт эйгэлэригэр үлэ миэстэтэ тэриллиэҕэ.
СӨ Ил Дархан уонна Бырабыыталыстыба пресс-сулууспатын матырыйаалыттан
Бэчээккэ бэлэмнээтэ Сардаана Баснаева.
Андрей Сорокин (СИА) хаартыскаларга түһэриитэ