Саха АССР 100 сыла

Саха АССР 100 сылыгар анаммыт тэрээһиҥҥэ балтараа тыһыынчаттан тахса киһи кытынна

Саха АССР төрүттэммитэ 100 сылыгар анаммыт улахан тэрээһиҥҥэ балтараа  тыһыынчаттан тахса киһи кыттыыны ылла.

 

Тэрээһин «Триумф» успуорт киинигэр буолла. Дьокуускайга Саха АССР 100 сылыгар «Эллэй эһэбит саҕаттан…» диэн устуоруйаттан саҕалаан Саха сирин үүнүүтүн-сайдыытын билиҥҥи олоххо тиийэ сэһэргиир устуоруйаны туруоран, улахан театрализованнай көрдөрүүнү бар дьоҥҥо бэлэх ууннулар.
Тэрээһиҥҥэ 1750 киһи кытынна, артыыстар, музыканнар, айар кэлэктииптэр, устудьуоннар, оскуола үөрэнээччилэрэ.
Ил Дархан Айсен Николаев бу үөрүүлээх күнүнэн итии-истиҥ эҕэрдэтин тиэртэ. Кини Саха сирэ Арассыыйаны кытта быстыспат ыкса ситимнээҕин бэлиэтээн туран, өрөспүүбүлүкэни дойдуларын муҥура суох таптыыр, бэриниилээх дьон туппуттарын, туталларын уонна сайыннарсалларын сүгүрүйэн, киэн туттан эттэ. Элбэх доҕордуу норуот олорор өрөспүүбүлүкэтэ өссө күүстээх уонна туруоруммут сыалыгар-соругар дьулуурдаах буоларыгар эрэнэрин биллэрдэ.
Саха сирин бастакы Бэрэсидьиэнэ, судаарыстыбаннай сүбэһит Михаил Николаев өрөспүүбүлүкэ олохтоохторугар истиҥ эҕэрдэтин тиэртэ.
Саха АССР 100 сылыгар анаммыт театрализованнай көрдөрүү устуоруйаттан саҕаланна. Хотугу эспэдииссийэ, өрөбөлүүссүйэ, Сэбиэскэй былаас олохтонуута, Саха АССР төрүттэниитэ көрөөччүлэр болҕомтолорун улаханнык тарта. Автономияны төрүттүүргэ сыраларын уурбут ытык дьоммут Максим Аммосов, Былатыан Ойуунускай, Исидор Барахов, Степан Аржаков сүрүн дьоруойдарынан буоллулар, кинилэр ааттарыгар ис сүрэхтэн сүгүрүйэн истиҥ тыллар этилиннилэр. Театрализованнай көрдөрүү дьону-сэргэни сэргэхситтэ. Тэрээһин муҥутуур чыпчаалынан Ил Дархан кэнчээри ыччакка истиҥ-иһирэх тылын этэн, баҕа санаатын тиэрдэн туран, кэм капсулатын дьоҥҥо-сэргэҕэ көрдөрүүтэ ытыс тыаһынан доҕуһуолланна.
Тэрээһин ыалдьыттарынан өрөспүүбүлүкэ бары улуустарыттан дэлэгээттэр, ыччаттар, уопсастыбаннай түмсүүлэр бэрэстэбиитэллэрэ буоллулар.

Хаартыскаларга Андрей Сорокин (СИА) түһэриилэрэ

0
0
Telegram @edersaas20