Саха АССР 100 сыла

Саха АССР 100 сылыгар аналлаах быыстапкалыыр үһүс киин аһылынна

Бүгүн киин куоракка  Хомсомуол болуоссатыгар Саха АССР төрүттэммитэ 100 сылыгар анаан куупал моһуоннаах быыстапкалыыр киин аһылынна. 

Манна кинигэ, сувенир, почта мааркатын, уруһуй, хартыына быыстапката турда. Саха АССР төрүттэммитэ 100 сылыгар аналлаах тэрээһиннэри тэрийэр «Конгресс-центр Якутия» автономнай тэрилтэ оператора Евгения Сесина бу киин туһунан маннык билиһиннэрдэ:

Биһиги бу быыстапкалыыр үһүс киини астыбыт. Бастакы киини муус устар 27 күнүгэр  «Туймаада» атыы-эргиэн дьиэтин 1-кы этээһигэр тэрийбиппит. Бу быыстапка киинэ ахсынньыга диэри үлэлиэҕэ. Иккис быыстапкабыт — «мобильнай» дэнэр, көһө сылдьар. Ол эбэтэр улуустары кэрийэ сылдьан үлэлэтэбит. Бу киин үлэтигэр  история наукатын хандьыдаата Айтал Яковлев эппиэттээх. Кини «Саха сирэ төрүттэниитигэр личинэс оруола» диэн лиэксийэни ааҕар. Алта улууска сылдьан баран, сайыҥҥы кэмҥэ тохтуу түспүтэ. Балаҕан ыйыттан сыл бүтүөр диэри хоту улуустары хабан туран, өссө 13 улууска баран кэлиэҕэ. 

Хомсомуол болуоссатыгар арыллыбыт  быыстапкалыыр үһүс киин  алтынньы бүтэһигэр диэри үлэлиэҕэ. Бу бырайыагы олоххо киллэрэргэ Ил Дархан Айсен Николаев көҕүлээбитэ.

Манна Саха АССР төрүттэммитэ 100 сылыгар туһаайыллыбыт араас тэрээһиннэр, кинигэ уонна сувенир быыстапкалара, лиэксийэлэр буолуохтара.

Билигин *Оскуола баһаара» буола турарынан сибээстээн, элбэх киһи сырыттын уонна билистин диэн бу быыстапка киинин арыйдыбыт.

 

Манна 100 сылга анаан оҥоһуллубут дьоһуннаах бэлэхтэр дьон көрүүтүгэр турдулар. Ол курдук, үбүлүөйдээх сылга төрөөбүт оҕоҕо бэлэхтэнэр үрүҥ көмүс «поргремушка» биир сүрүн эспэнээтинэн буолла.

Маны таһынан,  өрөспүүбүлүкэ чулуу дьонугар бэриллэр  өрөспүүбүлүкэни төрүттээччилэри үйэтитиллибит  бырабыыталыстыбаннай бэлэҕэ эмиэ дьон көрүүтүгэр турда.

Өрөспүүбүлүкэ 100 сылыгар анаан тахсыбыт араас кинигэ кыһаларын кинигэлэрэ быыстапкаҕа турда.

Маны таһынан, бүгүн Кэллиэксийэлиир дьон күннэринэн сибээстээн, почта мааркаларын мунньар Филателистар сойуустарын бочуоттаах чилиэнэ Сергей Кочеводов кэллиэксийэтэ дьон көрүүтүгэр турда. 

Ити курдук, Хомсомуол болуоссатыгар тиийэн, хайаан да олус интэриэһинэй быыстапкалыыр киини кытта билсэргитигэр ыҥырабыт.

 

Елена ПОТОЦКАЯ,

«Саха сирэ» хаһыат.

Хаартыска — Мария Васильева, СИА.

0
0
Telegram @edersaas20