Саха АССР 100 сылыгар — 100 эбийиэк!

Ааптар: Эдэр Саас

Бөлөххө киир:

Саха АССР 100 сылыгар социальнай суолталаах 100 эбийиэк тутуллар.

Саха АССР 100 сылын көрсө өрөспүүбүлүкэ киин куоратыгар уонна улуустарга социальнай суолталаах сүүс эбийиэк тутуллар. Тутуулар федеральнай уонна өрөспүүбүлүкэ үбүгэр-харчытыгар, ол иһигэр национальнай бырайыактар чэрчилэринэн ыытыллаллар. Бу туһунан СӨ Үп миниистирэ Валерий Жондоров социальнай ситиминэн быһа сибээскэ эттэ.

Билиҥҥи туругунан 76 эбийиэк үлэҕэ номнуо киллэриллибит. 2021 сыл бүтүөр диэри өссө 11 бүтүөхтээх. Оттон хаалбыт уон үһү 2022 сылга түмүктүүр былааннаахтар.

Миниистир бэлиэтээбитинэн, эбийиэктэри тутууга судаарыстыба бырагырааматыгар кэлэр сылга 2,9 млрд солк. үбүлээһин көрүллүөҕэ.

Тутууга оскуолалар, уһуйааннар, балыыһалар, успуорт тэрилтэлэрэ бааллар.

Ол курдук, бу Үөһээ Бүлүү сэлиэнньэтигэр уһуйаан, саҥаралларыгар кэһиллиилээх оҕолорго Дьокуускайга өрөспүүбүлүкэтээҕи анал (коррекционнай) оскуола-интэринээт, Ленскэйгэ технологическай техникум, Туора-Күөлгэ оскуола-уһуйаан, Дьокуускайга 990 миэстэлээх оскуола, Алдаҥҥа, Чульмаҥҥа уонна Дьокуускайга хаҥкылыыр сирдээх физкультурнай-доруобуйаны чэбдигирдэр комплекстар, Өлүөхүмэҕэ кырдьаҕастары уонна инбэлииттэри көрөр-истэр социальнай стационарнай дьиэҕэ утуйар куорпус, Бороҕоҥҥо элбэх хайысхалаах доруобуйаны чэбдигирдэр-спортивнай комплекс, 1000 миэстэлээх стадион, Мындаабаҕа дэгиттэр спортивнай комплекс уонна Бүлүүгэ балыыһа комплекса.

Санатан эттэххэ, СӨ Ил Дархана Айсен Николаев Ил Түмэҥҥэ анал этиитигэр, Саха АССР 100 сыллаах үбүлүөйүгэр өрөспүүбүлүкэҕэ саҥа дьиэлэр, оскуолалар, балыыһалар, култуура уонна успуорт тэрилтэлэрэ тутуллуохтара, суол-иис оҥоһуллуо, аныгы үйэ ирдэбилигэр эппиэттиир уопсастыбаннай эйгэ тэриллиэ диэн бэлиэтээн турар.

Биһиги корр.,

СӨ Ил Дархан уонна Бырабыыталыстыба пресс-сулууспатын матырыйаалыттан.