Өрөспүүбүлүкэ астыыр-үөллүүр тэрилтэлэрэ Москваҕа ыытыллыбыт Саха сирин уонна Уһук Илин күннэригэр ситиһиилээхтик кыттан кэллилэр. Кинилэр барыта биэс сиринэн тэриллибит ас-үөл дьаарбаҥкатыгар “Саха сиригэр оҥоһулунна” бырайыак чэрчитинэн эт, балык, үрүҥ ас эгэлгэтин уонна сир аһыттан астаммыт бородууксуйаны хото көрдөрдүлэр, атыылаатылар.
“Биһиги бу сырыыга тэрээһин далааһыннааҕын аахсан, 700 көрүҥ бородууксуйаны илдьэ барбыппыт, — диир тыа хаһаайыстыбатын уонна ас-үөл бэлиитикэтин миниистирин солбуйааччы Семен Потапов. – Өскөтүн Бүтүн Россиятааҕы “Көмүс күһүн” дьаарбаҥкаҕа сыл ахсын ортотунан 10 туонна аһы-үөлү атыылыыр эбит буоллахпытына, ити күннэргэ 17 туонна бородууксуйа батарылынна”.
Дьаарбаҥкаларга биирдиилээн атыы кэнниттэн дегустацияҕа кыттыбыт кууһунан ылааччылар уонна дойдуга бөдөҥ “Фуд Сити” ас-үөл киинэ атыыласпыттар. Өссө уһуннук харайыллар бородууксуйаттан сороҕун Москваҕа ыытыллыахтаах регионнар икки ардыларынааҕы Орооһоспотооҕу дьаарбаҥкаҕа хаалларбыттар. Тэрийээччилэр бэлиэтииллэринэн, өрүү буоларын курдук, тоҥ уонна ыыһаммыт чыыр, уомул, тууччах, муксуун, таба уонна убаһа этиттэн деликатестар, ыыһаммыт сылгы этэ атыыга хамаҕатык барбыттар. Оттон дьэдьэн барыанньатын дьаарбаҥка саҕаланаатын кытта ньылбы сотон ылбыттар.
Саха сирин күннэригэр өрөспүүбүлүкэттэн 20 астыыр-үөллүүр тэрилтэ кыттыбытыттан “Скиф”, “Туймаада-Агроснаб”, “Таба”, “Якутия” хампаанньалар уонна “Амма”, “Чурапчы”, “Полюс холода” кэпэрэтииптэр эргиэннэрэ ордук табыллыбыт.
Василий НИКИФОРОВ, «Саха сирэ» хаһыат, edersaas.ru