Оскуолаҕа үөрэнэ сылдьыаҕыттан Гаврил Неустроев диктор идэлээх буолуон баҕарара.
Елена ПОТОЦКАЯ, «Саха сирэ» хаһыат, edersaas.ru
Кини Таатта улууһун Баайаҕа орто оскуолатыгар 10-11 кылаастарга үөрэнэ сылдьан, “Томтор-ТВ” (Баайаҕа почтовай отделениетын аата) диэн нэһилиэк телеустуудьуйатыгар диктордыыр эбит. Эдэр киһи таптыыр идэтигэр — Саха араадьыйатыгар хайдах кэлбитин туһунан маннык кэпсэттибит.
— 1999 сыллаахха оскуолабын бүтэрэрбэр култуура колледжыгар “Араадьыйаҕа уонна телевидениеҕэ тэрийэр үлэ” салаата аһыллыбыта. Мин эксээмэн туттара кэлэрбэр хоһоон эрэ баар курдук санаан, биир бэйээт айымньытын хоп курдук нойосуус үөрэтэн, дойдубуттан бэркэ бэлэмнээх курдук сананан кэлбитим. Арай кэлээт да, үөрэниэхтээх кыһабар тиийэн, хоһоону таһынан үгэ уонна монолог нойосуус ааҕыахтаах эбиппин. Мин биир түүн иһигэр үгэлээх монологу үөрэт да үөрэт! Сарсыныгар эксээмэҥҥэ тиийэн хоһооммун, үгэбин, монологпун үнтү хааһылаан, буккуйуу бөҕөнү буккуйан, долгуйуу бөҕөнү долгуйан:”Чэ, хайыыгыт?” – диэбиттии, эксээмэнниир дьонум диэки мэлээриччи көрөн кэбиспитим, — диэн кэпсээнин саҕалаан, араадьыйа суруналыыһа киһини дэлби күллэрдэ.
— Онтон бэркиһээтилэр дуу, куоласпын сөбүлүү иһиттилэр дуу, “Саха сирэ” хаһыаты туттаран кэбистилэр уонна: “Манна суруллубут улуустар сонуннарын аах”, — диэтилэр. Мин симмэр түһэн, холкутуйуохпун холкутуйан, сорудахтарын толорон, ааҕан биэрдим. Кэлин билбитм, эксээмэннээччилэр ортолоругар Саха араадьыйатын дириэктэрэ Тарас Тарасов баар эбит. Кини: “Бу уол эксээмэннэрин барытын аастаҕына, үөрэтэн баран, Саха араадьыйатыгар аадырыстаан ыытаарыҥ”, — диэбит. Бу туһунан үөрэхпин бүтэрэн диплом ылар күммэр колледж дириэктэрэ Аграфена Макарова эппитэ.
— Ол аата Тарас Лукич эйиигин үөрэххэ ылалларын курдук “сакаас” оҥордоҕо дии?
— Арааһа. Онон куолаһым миэхэ идэбин таба таларбар улахан оруолу оонньоон турар.
— Дьэ, “сакаастаммыт”, баҕалаах “НВК-ҕар” тиийдиҥ?
— Суох. Төрөөбүт Тааттабар анатан, Былатыан Ойуунускай аатынан тыйаатырга үлэлии тиийбитим. Онтон биир ханнык эрэ улахан тэрээһиҥҥэ куоракка буолар кэнсиэргэ ыытааччынан ыыппыттара. Арай үлэбин түмүктээн истэхпинэ, сцена кэтэҕиттэн Саха араадьыйатын дириэктэрэ Тарас Тарасов тахсан кэллэ уонна: “Бу ханна сүтэ сылдьаҕын? Дикторынан үлэҕэ ыҥырбытым буолбат дуо?” – диэн баран, күүтэрин эппитэ. Мин сотору кэминэн дьиэбин-уоппун булунан, куоракка кэлэн Саха араадьыйатыгар үлэлии киирбитим. Онтон сотору буолаат, дьиэ кэргэним балаһыанньатынан улууска барарга күһэллибитим. “Бэрдьигэс” телеустуудьууйаҕа кылгастык үлэлии түһээт, хамнастаах үлэҕэ тутууга көспүтүм.
— Ол да буоллар, санаам өрүү араадьыйа дикторын идэтигэр сытара. Туоххаһыйбыт күммэр хаһыаты ылан дорҕоонноохтук ааҕан ыларым. Оннук куолас таһаарыахпын, этиэхпин-тыыныахпын баҕарар этим. Онтон 2013 сыллаахха араадьыйата суох табыллыа суохпун санаан, иккистээн үлэҕэ ылалларыгар көрдөспүтүм. Дьолго, биир тыла суох ылбыттара. Ол кэмтэн ыла таптыыр эйгэбэр үлэлии сылдьабын.
…Гаврил Неустроев билигин куолаһа чөллөрүйэн, суруналыыс быһыытынан уопутуран, Саха араадьыйатын истээччилэрин куттарын туппут биир тарбахха баттанар айар үлэһиккэ тиийэ үүннэ. “Миигин куолаһым аһатар”, — диэн киэн тутта кэпсиир да, кини тус бэйэтэ айар үлэ абылаҥар ылларан, ис иһиттэн айымньылаахтык үлэлиир буолан, бастыҥнар ахсааннарыгар сылдьар буоллаҕа. Саха араадьыйатын иккис “Левитаныгар” ( бастакы «Левитан” Эдуард Рудых буоллаҕа) айар үлэтигэр ситиһиилэри баҕарабыт!
Елена ПОТОЦКАЯ, «Саха сирэ» хаһыат, edersaas.ru