Саха араадьыйатын бастыҥ үлэһиттэрэ чиэстэннилэр

Ааптар: 
Бөлөххө киир:

«Саха» НКИХ тэлэбиидэнньэтигэр Саха араадьыйатын 90 сыллаах үбүлүөйүгэр анаммыт бырааһынньыктааҕы биэриигэ араадьыйа үлэһиттэрин чиэстээтилэр.

edersaas.ru

Саха араадьыйатын 90 үбүлүөйдээх сылынан Араадьыйа уонна тэлэбиидэнньэ бэтэрээнэ Лира Белолюбская бэйэтин эҕэрдэтин куйаар нөҥүө дьиэтиттэн олорон тиэртэ. Бэтэрээн араадьыйа кини олоҕор суолтатын, бииргэ үлэлээбит чаҕылхай, улуу кэллиэгэлэрин ахтан ылла.

«Биһиги оннубутугар атын көлүөнэ дьон кэллилэр. Бу холкутук тутталларын, саҥаралларын-кэпсииллэрин, биһиги атын үйэҕэ, атын ирдэбигэ үлэлээбиппит. Онон икки үйэ көлүөнэтин ситимниир араадьыйабын дьоһуннаах үбүлүөйүнэн эҕэрдэлиибин!» — диэн Лира Белолюбская санаатын тиэртэ. Араадьыйа бэтэрээнэ өссө: «Чэппиэр аайы сахалыы хаһыаттарбын бырааһынньык курдук кэтэһэбин», — диэн хаһыатчыттары эмиэ үөртэ.

Суолталаах тэрээһиҥҥэ үлэлэригэр ситиһиилээх араадьыйа үлэһиттэрин биэдэмистибэлэр салайааччылара эҕэрдэлээтилэр, анал наҕараадалары туттардылар. Ол курдук, Саха араадьыйатын көмүс куолаһа Эдуард Рудых СӨ култууратын  үтүөлээх үлэһитэ аакка тигистэ. Биллиилээх суруналыыска Ил Дархан пресс-сэкирэтээрэ, «Саха» НКИХ бэрэсидьиэнинэн үлэлээбит Афанасий Ноев суолталаах наҕарааданы туттарда.  Саха араадьыйатын «Сонуннарын» солбуллубат  суруналыыһа Борис Гоголев «СӨ Бочуоттаах связиһа», аатырбыт спортивнай суруналыыс Василий Посельскай Ил Түмэн кыраамататынан уонна кыһыл көмүс чаһынан наҕараадаланнылар.

Араадьыйа суруналыыһа Борис Гоголев Саха араадьыйата кини олоҕор суолтатын туһунан бэлиэтээн туран, «Афанасий Готовцев, Дмитрий Избековы, Виктория Максимова, Любовь Скрябина,  Степан Дадаскинов, Николай Максимов курдук улуу айар дьону кытта алтыһан ааспыппар, күүс-кыах тиийэринэн билигин Саха радиотыгар үлэлии сылдьарбынан дьылҕабар махтанабын!  90-c сыллар уустук кэмнэригэр үлэлии кэлбиппит, билигин пандемия ыарахан кэмигэр үлэлии сылдьабыт.

Онон биһиги көлүөнэ суруналыыстара бары уустуктары  эрэллээхтик аһардар көлүөнэ дьоммут«, диэн санаатын тиэртэ.

Спорт суруналыыһа Василий Посельскай бэйэтин наҕараадатын куйаар нөҥүө тутта. Кини үлэтинэн өрөспүүбүлүкэтин бары улуустарын эрэ буолбакка, аан дойдуну барытын кэрийбитин ахтан ылла.

Ити курдук, Саха араадьыйатын 90 сыллаах үбүлүөйдээх күнүгэр  бастыҥ үлэһиттэр араас биэдэмистибэннэй наҕараадалары туттулар. Араадьыйа үбүлүөйэ төһө да уустук кэмҥэ бэлиэтэннэр, саха киһитигэр сырдык өйдөбүлү хаалларда, дууһатыгар сылаас иэйиини уһугуннарда. Саха араадьыйатын кэлэктиибин үбүлүөйдээх бырааһынньыктарынан истиҥник эҕэрдэлиибит!

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар тһэриитэ («Быһа эпииртэн» скриншот).

+1
0
+1
0
+1
0
+1
0
+1
0
+1
0
+1
0