Бүгүн сибээс бары эйгэтин үлэһиттэрэ идэлээх бырааһынньыктарын бэлиэтииллэр.
edersaas.ru
Бу күн сибээс бары үлэһиттэриттэн чорботон, Саха араадьыйатын үлэһиттэрин анаан эҕэрдэлиибит. Биллэн турар, арааадьыйа үлэһиттэрэ бэйэлэрин үлэлэрин күннэтэ сайыннарарга, интэриэһинэй гына оҥорорго дьулуһаллар. Бу туһунан «Тэтим» араадьыйа сарсыардааҥҥы «Эрдэһиттэр» биэриитин шеф-эрэдээктэрэ Светлана Попова маннык кэпсиир:
— Саха араадьыйата кэм кэрдии тэтиминэн сайдан, 89 сылын хас биирдии ыалга тоҥсуйбакка киирэр күндү ыалдьыт буолар диэтэхпинэ, сыыспатым буолуо. Араадьыйа киһини умсугутар бэйэтэ туспа эйгэнэн буолар. Хас биирдии араадьыйа үлэһитэ ис сүрэҕиттэн ылсан үлэлиир. Мин санаабар, биһиги үлэбит — тугу барытын умнан, дууһалара араадьыйанан олорор эрэ дьон үлэлиир эйгэлэрэ.
Быйылгы сылга «Саха» НКИХ үлэһиттэрэ тохтоло суох араас сирдэргэ, дойдуларга баран үөрэннибит, билиибитин хаҥаттыбыт. Бу хайысхаҕа үлэ өссө да бара турар. Киһи бэйэтин хараҕынан көрөн, эт кулгааҕынан истэн үөрэннэҕинэ, хампаанньабыт үлэтэ көдьүүстээх буоларын өйдүүр салайааччылартан сайдыы улахан тутулуктаах.
Ааспыт ый бүтүүтэ Казань куоракка улуу татаар омуктар араадьыйалара хайдах үлэлиирин миэстэтигэр баран көрөн кэллибит. Сарсыарда 7 чаастан 10 чааска диэри, эмиэ биһиги “Эрдэһиттэрбит» курдук, анал «блоктаахтар» эбит. 10 чаастан эмиэ быһа эфиргэ ыытааччы олорор. Биһиги билигин сорох чаастарбытыгар ыытааччыта суох «аптамаат» барар эбит буоллаҕына, кинилэргэ оннук суох. Түүн 12 чааска диэри ыытааччы баар. Бэлэм таҥан оҥоһуллубут элбэх мүнүүтэлээх биэрии диэн суох. Биэрии барыта быһа эпииргэ барар. Киһи атын дойдуга үлэлиир биир идэлээхтэрин уопуттарын көрөн-истэн, уратыны, сонуну айыан-тутуон баҕата күүһүрэр. Онон Казаньҥа сырыыбытын тэрийбит хампаанньабыт салайааччытыгар Олег Марковка махталбыт муҥура суох.
Биһиги аҕыйах ахсааннаах норуот буоларбытын эмиэ умнуо суохтаахпыт. Олоҥхобутун, уһулуччулаах дьоннорбут туһунан биэриилэри оҥорон иһитиннэрбэтэхпитинэ, кэлин 10-20 сылынан хайдах өйдөөх-санаалаах дьон иитиллэн тахсарын эмиэ учуоттуохтаахпыт. Соҕотох Саха араадьыйатын биир уратыта, дьиҥэ, итиннэ сыттаҕа. Олох тэтиминэн саҥа сүүрээннэри киллэрэн, бэйэбит уратыбытын өйдөөн, араадьыйабыт сайдарын, истээччитэ өссө элбиирин туһугар үлэлиибит, үлэлиэхпит даҕаны.
Саха араадьыйатыгар өр сылларга үлэлээбит бэтэрээннэри, бүгүн «Тэтим» араадьыйаҕа айа-тута сылдьар араадьыйа суруналыыстарыгар эҕэрдэбит бастыҥын тиэрдэбит! Истээччилэргит өссө да элбии турдуннар, айар үлэҕит өрүү сонун биэриилэринэн соһутан, барыбытын үөрдэ турдун диэн алҕыыбыт!
Елена ПОТОЦКАЯ, «Саха сирэ» хаһыат, edersaas.ru
Хаартыска — Светлана Попова архыыбыттан.