Бүгүн, балаҕан ыйын 16 күнүгэр, “Сахамедиа” Өрөспүүбүлүкэтээҕи пресс-кииҥҥэ, “Саха” НКИХ араадьыйатын саҥа сезона саҕаламмытынан, суруналыыстары уонна истээччилэри кытта көрсүһүү, пресс-кэмпириэнсийэ буолла.
edersaas.ru
Көрсүһүүнү “Тэтим — Саха араадьыйатын” дириэктэрэ Николай Бястинов иилээн-саҕалаан ыытта. Пресс-кэмпириэнсийэҕэ уопсастыбаннай-политическай салаа шеф-эрэдээктэрэ Альбина Тарабукина, сарсыардааҥҥы быһа эфир шеф-эрэдээктэрэ Светлана Попова уонна киэһээҥҥи бырагыраамалар шеф-эрэдээктэрдэрэ Эдуард Рудых кытыннылар.
Дириэктэр Николай Бястинов бастаан, эфиргэ туох уларыйыы киирбитин, ханнык саҥа рубрикалар, биэриилэр баар буолбуттарын уонна инники былааннары билиһиннэрдэ.
Ол курдук, “Саха сирин чулуу дьоно”, “Кэпсээҥҥит, хайдах олороҕут?”, “История быыһын сэгэтэн”, тыа хаһаайыстыбатыгар аналлаах, о.д.а. саҥа рубрикалар, ааптарыскай биэриилэр бэйэлэрин истээччилэрин булуохтара диэн айар кэлэктиип эрэнэр.
Саха араадьыйатын истээччилэрин миэстэтиттэн, сабыытыйалар буола турар сирдэриттэн элбэхтик быһа холбонуулар, о.д.а. сонун, сэргэх биэриилэр күүтэллэр.
Сонуну саамай түргэнник тарҕатааччынан, биллэн турар, араадьыйа буолар. Онуоха, иһитиннэрии өрөспүүбүлүкэни суһаллык тилийэ көтөрүн инниттэн, Саха сирин бары улуустарыгар кэрэспэдьиэннэр ситимнэрэ күүскэ үлэлиэҕэ диэтэ дириэктэр.
— Биһиги араадьыйабыт үксүн быһа эфиргэ үлэлиир. Үлэ күнүгэр элбэх информация барыаҕа. “Эрдэһиттэр” биэриибитин билэҕит. Сарсыардаттан киэһээҥҥэ диэри пультка ыытааччылар олороллор. Истээччилэрбит, хаһан баҕарар биһиэхэ төлөпүөнүнэн эрийэн кэлэн санааҕытын атастаһыаххытын, этиэххитин, ватсап нөҥүө иһитиннэриилэргитин, интэриэһиргиир ыйытыыларгытын биэриэххитин сөп. Муусукабытын эмиэ умнубаппыт. Ордук субуотаҕа-өрөбүлгэ муусука үгүс буолуоҕа. Киэһээҥҥи бырагыраамаларбытыгар “Сулустаах чаас” диэн биэриибитигэр эдэр талааннарбыт, киинэ, тыйаатыр үлэһиттэрэ, сулустара, эдэр суруйааччылар, бэйиэттэр ыалдьыттыахтара. Билигин биһиги “Тэтим” саҥа мобильнай сыһыарыыланныбыт. Андроидка да, Айфоҥҥа да, IOS аналлаах “Тэтим Араадьыйа” босхо сыһыарыытын сүрэхтэниитэ буолла. Баара-суоҕа биир нэдиэлэ иһигэр бу сыһыарыыбыт 28-с миэстэҕэ тахсан, топ-30 Арассыыйа саамай элбэхтик “хачайданан ылыллар” мусукаалынай сыһыарыыларыгар киирдэ. Инникитин Интернеккэ эмиэ тахсыахпыт, — диэтэ Николай Гаврильевич.
Саха араадьыйатын эрэллээх, көхтөөх истээччитэ Афанасий Иннокентьевич Сергеев сарсыарда эрдэ 6:30 чааска диэри биэриилэри олус сэҥээрэрин, онтон “Тускулу” күүтэрин эттэ. Баҕа санаа быһыытынан, тыа хаһаайыстыбатыгар үлэлээбит уопуттаах дьону, нэһилиэктэр дьокутааттарын хото ыҥыран, кэпсэтэр буоллар, олус интэриэһинэй буолуох этэ диэтэ. Итиэннэ, доруобуйа харыстабылын боппуруостарыгар уонна чөл олоҕу бырапагаандалыыр биэриилэри сөбүлүүрүн, маннык туһалаах биэриилэри үксэтэр наадатын бэлиэтээн туран, айар кэлэктиипкэ ситиһиилэри уонна Саха араадьыйатын өссө күүскэ сайыннаралларыгар баҕарда, бары бииргэ үлэлиэҕиҥ, диэтэ.
Николай Бястинов уонна Альбина Тарабукина, Светлана Попова, Эдуард Рудых итиэннэ кэпсэтиигэ холбоспут, саҥа мусукаалынай биэриилэри бырайыактыы сылдьар эрэдээктэр Иван Тарасов айар үлэ былаанын, бырайыактарын, биэриилэрин ис хоһоонун сиһилии билиһиннэрдилэр, суруналыыстар ыйытыыларыгар толору хоруйдары биэрдилэр.
Ол курдук, холобур, “Саха араадьыйата” диэн – бренд, ону төнүннэриигэ туох оҥоһуллар, диэн ыйытыыга: “Билигин лицензиябыт бакаа быһаарылла илик. Тоҕо диэтэххэ, урукку лицензиянан, Дьокуускайбыт—“Тэтим Араадьыйа”, өрөспүүбүлүкэбит — “Саха араадьыйата” диэн, онон, Роскомнадзору кытта үлэ барар. Генеральнай дириэктэрбитин Олег Марковы кытта ити тыын боппуруоспутун быһаарыыга бииргэ ыкса үлэлэһэбит. Саха сирин араадьыйата, 2020 сылга 90 сыллаах үбүлүөйбүтүн ааттаах-суоллаах, лицензиялаах көрсөргө бэлэмнэнэнэбит, эрэнэбит”, — диэтэ дириэктэр Николай Бястинов.
Татьяна МАРКОВА, edersaas.ru
Ааптар хаартыскаҕа түһэриилэрэ.