Сүрүн Уопсастыба

Саха араадьыйата 90 cыллаах үбүлүөйүн бэлиэтиир

Бүгүн  «Саҥарар Дьокуускай!» диэн тылларынан саҕалаан, Саха араадьыйата аан бастаан эпииргэ тахсыбыт 90 сыллаах үбүлүөйүн бэлиэтиир.

edersaas.ru

1930 сыллаахха сэтинньи  7 күнүгэр саха араадьыйата саха норуота духуобунай сайдыытыгар сүҥкэн суолталаммыта. Саха араадьыйата күн бүтүн өрөспүүбүлүкэни бүттүүнүн хабар соҕотох маассабай сириэстибэ буолар. Араадьыйа үлэһиттэригэр бэлиэ күнүнэн Ил Дархан Айсен Николаев бэйэтин эҕэрдэтин тиэртэ.

Саха араадьыйата күн аайы өрөспүүбүлүкэ араас муннуктарыгар олорор — Лаптевтар  муораларыттан  Дьааҥы уонна Өймөкөөн хайаларыгар тиийэ, кыра нэһилиэк күннээҕи олоҕуттан планетаҕа буола турар сонуннарга тиийэ кэпсээн, олус суолталаах уонна эппиэттээх үлэни ыытар.   90 сыл устата Саха араадьыйатыгар үгүс талааннаах айар үлэһиттэр үлэлээн аастылар уонна айымньылаахтык үлэлии сылдьаллар. Араадьыйа үлэһиттэрэ Саха сирин аныгы кэмин устуоруйатын кэпсээн, сырдатан, өрөспүүбүлүкэ хас биирдии олохтооҕун күннээҕи олоҕун сэргэхситэллэр. 

Бүгүҥҥү күҥҥэ аан дойдуга информация технологията балысхан тэтиминэн сайдар. Ол эрээри ону тиэрдиигэ биир саамай түргэн уонна маассабай көрүҥүнэн араадьыйа буолар. Билиҥҥи кэм ирдэбиллэригэр сөп түбэһэн, Саха араадьыйата эмиэ иннин диэки эрэллээхтик хардыылаан, сайдан иһэрэ үөрдэр. Саха араадьыйатын саҥата хас дьиэ ахсын дуораһыйа туруохтун! — диэн өрөспүүбүлүкэ Аҕа баһылыга бэйэтин эҕэдэтигэр тиэртэ.

Бүгүн бырааһынньык күн Саха араадьыйата сарсыарда «Эдэһиттэр» биэрииттэн саҕалаан, киэһэ хойукка диэри  90 сыллаах үбүлүөйдээх биэриилэрин куйаар нөҥүө ыыта олорор. Онон бүгүн истээччилэргэ эмиэ улахан бырааһынньык! Киэһэ 19 чааска Саха араадьыйатыгар анаммыт «Саха» НКИХ тэлэбиидэнньэ ханаалыгар бырааһынньыктааҕы дьоро киэһэ буолуоҕа. Онно араадьыйа дириэктэрэ Николай Бэстиинэп үбүлүөйдээх бырайыактар тустарынан билиһиннэриэҕэ.

 

Елена ПОТОЦКАЯ, «Cаха сирэ» хаһыат, edersaas.ru

 

 

0
0
Telegram @edersaas20

Добавить комментарий