Саха АККОР-а хотугу улуустар бааһынайдарын, кэпэрэтииптэрин киэҥник хабарга соруктанар
Саха сиринээҕи АККОР Сэбиэтэ быйылгы үлэтин-хамнаһын ырытыста уонна кэлэр сыллааҕы былаанын торумнаата. Сыл түмүктэнэн эрэр буолан, Сэбиэт чилиэннэрэ улуустартан кэлэ сатаабыттар: 31 чилиэнтэн 20-тэн тахса киһи баар.
Бу мунньахха наар көтүтэр, сылдьыбат Сэбиэт чилиэннэрин таһааран баран, атыттары ыларга этии киирдэ. АККОРС (СӨ бааһынай хаһаайыстыбаларын уонна тыа хаһаайыстыбатын кэпэрэтииптэрин ассоциацията) 16 улууска салаалаах. Саамай көхтөөхтүк Амма, Чурапчы, Таатта салаалара үлэлииллэр. АККОРС бэрэсидьиэнэ Александр Артемьев чугастааҕы кэмҥэ хотугу улуустары киэҥник хабарга сорук туруорда. Ассоциация чилиэннэрин реестрэ оҥоһулла сылдьар. Билигин, барыллаан ааҕыынан, 1124 чилиэннээх. Александр Еремеевич улуустардааҕы салаалар салайааччылара чилиэннэрин чуолкайдыылларыгар уонна усунуоһу хомуйууну суһалсытарга ыйыы биэрдэ. Бачча мустубучча, олунньуга Москваҕа буолуохтаах АККОР сийиэһигэр дэлэгээттэринэн кимнээҕи ыыталларын быһаарыстылар.
Сэбиэт чилиэннэрэ мунньах иннинэ тыа хаһаайыстыбатын миниистирэ Александр Атласовтыын уонна Ил Түмэн аграрнай боппуруостарга, тыа сиригэр сис кэмитиэтин бэрэссэдээтэлэ Андрей Находкинныын көрүстүлэр. Александр Павлович министиэристибэ саҥа тутулун иһитиннэрдэ. “Министиэристибэ аппараатыгар 64 буолан хааллыбыт. Департамеҥҥа эрдэ 9 киһи үлэлиир буоллаҕына, ирдэбил уларыйан, 12 киһилээх буолуохтаах. Ол иһин, департаменнары отдел оҥордубут”, — диэтэ миниистир уонна бааһынайдарынан, кэпэрээссийэнэн дьарыктанар отделга начаалынньыгынан анаммыт Айаал Тимофеевы итиэннэ бу отделга сүрүн исписэлииһинэн бааһынайдар үчүгэйдик билэр киһилэрин, Зарема Бочкареваны, анаабытын билиһиннэрдэ.
Василий НИКИФОРОВ, «Саха сирэ» хаһыат, edersaas.ru