Ааспыт нэдиэлэҕэ Уус Алдан улууһугар үлэбит чэрчитинэн командировкаҕа сылдьан кэллибит. Онно Тиит Арыы нэһилиэгин историятын, ураты дьарыктаах дьонун кытта билсибиппит. Биир ыалга киирбиппит, биэс нуучча оҕото оонньуу олорор эбит. Хостон нуучча көрүҥнээх дьахтар тахсан кэллэ. Соһуйуохпут иһин, уу сахалыы саҥаран, кэпсэтэн саҕалаата. Кини Ольга Аргунова диэн 34 саастаах, уон оҕолоох герой-ийэ эбит. Кини дьиэ кэргэнин туһунан киэн тутта маннык кэпсиир:
- Мин омукпунан тоҥ нууччабын. Ол эрээри, төрөппүттэрим Бурятияҕа олохсуйаннар, мин Бурятияҕа төрөөбүтүм. Оскуоланы бүтэрэн бараммын, Кяхта куоракка үөрэнэ кэлбитим. Онно кэргэмминээн Ньургуннуун билсибиппит. Оччолорго Ньургун – тырахтарыыс, оттон мин – иистэнньэҥ идэлэригэр үөрэммиппит. 1999 сыллаахха ыал буоламмыт, Саха сиригэр көһөн кэлбиппит. Кулун тутарга кэлбиппит, онтон номнуо балаҕан ыйыгар мин сахалыы саҥарар, быһаарсар буолбутум. Билигин сахалыы ыраастык саҥарабын, оҕолорбутун сахалыы ииппиппит. 34 сааспар уон оҕону төрөтөн, герой-ийэ буоллум. Уон оҕо диэн эттэххэ дөбөҥ, эйэлээх эйгэни тутарга, үөскэтэргэр, оҕолору иитиигэ улахан сыра-сылба наада. Мин кыра кыыспын Верониканы көрөн дьиэҕэ олоробун, оттон кэргэним Ньургун тырахтарыыстыыр. Тыа сиригэр олорор буоламмыт улахан хаһаайыстыбалаахпыт. 10 сүөһүнү уонна сылгы үөрүн иитэн олоробут. Оҕолорбут барытыгар илии-атах буолан көмөлөһөллөр. Биэс оҕобут оҕо саадыгар сылдьаллар, үс оҕобут оскуолаҕа үөрэнэллэр, улахаммыт Роман номнуо устудьуон киһи. Судаарыстыбаттан көмө бөҕөтө кэлэр. Элбэх оҕолоохпутунан Дьокуускай куоракка дьиэ атыыласпыппыт. Онтон былырыын фургон массыынан биэрбиттэрэ. Быйыл миэхэ өрөспүүбүлүкэтээҕи ийэ күнүн көрсө «Ийэ албан аата» бэлиэ туттарбыттара. Оҕолорбут ситиһиилэриттэн дьоллонобут, кинилэринэн киэн туттабыт.
Айтана АММОСОВА
+1
+1
+1
+1
+1
+1
+1