Саха уолаттара «New Generation» панкратион турнирын чөмпүйүөннэрэ
Ахсынньы маҥнайгы күнүгэр саха уолаттара Артем Авраменко уонна Игнат Андросов Уссурийскай куоракка ыытыллыбыт «New Generation» панкратиоҥҥа турниры кыайан, чөмпүйүөн үрдүк аатын сүктүлэр. Күрэхтэһиини Gladiator Fight Team уонна Fight Night Global промоушн бөлөхтөрө тэрийдилэр.
Көҥүл тустууга Саха Өрөспүүбүлүкэтин чөмпүйүөнэ Игнат Андросов Владивостоктан төрүттээх, панкратиоҥҥа Уһук Илин икки төгүллээх чөмпүйүөнүн Калантар Магомедовы хотто. Игнат утарсааччытын охторон түһэрэн баран тыынын хаайан кыайыыны ситистэ.
84 киилэҕэ Алдан уола Артем Авраменко бастаан ыарахан түгэҥҥэ түбэһэн баран, сөпкө туттан утарсааччытын Башир Захаров үрдүгэр тахсан хас да күүстээх охсууну оҥорбутугар, судьуйа тохтотто. Оттон өссө биир дойдулаахпыт Октябрин Яковлев Уссурийскай уолугар Владимир Цойга биир очукуонан кыайтарда.
Николай Попов, «Саха сирэ» хаһыат, edersaas.ru